Моско областьысе Химки ола гыч «Лебёдушка» калык муро ден куштымаш йоча образцовый ансамбль тений Йошкар-Олаште эртыше «Михаил Мурашко приглашает друзей» фестивальыште «Калык куштымаш» номинацийыште гран-прим сеҥен налын. 24 апрельыште коллективлан 25 ий темын.
Ансамбльым 1998 ийыште руш калык муро ансамбль семын чумырымо. 2006 ийыште тудлан «Йоча образцовый коллектив» лӱмым пуымо. А 2008 ийыште коллективым калык муро ден куштымаш ансамбль манме. Кызыт коллективым Ольга Степанова вуйлата, балетмейстерлан Элина Чаплыгина шотлалтеш.
Тушко 7-18 ияш икшыве-влак коштыт. Нуно тыште чын мураш, устан да лывыргын кушташ тунемыт. Ныл туныктышо пашам ышта.
Ансамбльын реперутарже моткоч поян. Тӱрлӧ мурым шергылтарат, ойыртемалтше куштымашым шындат. Тыгодым сеҥымашышт ятыр. Ӱдыр-рвезе-влак оласе, областьысе, Российысе, тӱнямбалысе конкурслашке, фестивальлашке чӱчкыдын ушнат да ончыл верла дене ятыр гана палемдалтыныт.
Саратов ола гыч толшо Ирина Алексеевна Новикова (снимкыште) коллективыште хореографлан луымшо ий пашам ышта. Ансамбль нерген тыгерак палдарыш:
– Ме Российысе веле огыл, тыгак тӱнямбалысе калык-влакын куштымашыштым шындена. Нунын коклаште – аргентин, армян, румын, грузин, татар да моло куштымаш. Арнялан вич гана погынена. Йоча-влакым оксам тӱлыде туныктена.
«Михаил Мурашко приглашает друзей» фестиваль-конкурсышто ме кок гана лийынна. Тений «Марий Эл» кугыжаныш ансамбльын шындыме марий куштымашыже-влакым ончен куаненам, моткоч келшен. Рӱдола моткоч сылне, – мане И.Новикова.
«Лебёдушка» йоча коллектив шке пашаж дене чаплана, шукылан палыме лийын шуктен. Вес ганат Марий кундемышкына толыт манын ӱшанена. Вет нуным ончен, марий коллектив-влакат шукылан тунемын сеҥат.