Медведево район Цибикнур селаште ондакысе колхозын пӱяштыже катокым ыштыме, хоккей дене модаш печым келыштарыме.
Чыла тиде пашам селаштына илыше Владимир Кочкарев ворандара. Тудо кажне ийын тиде пӱяште хоккей площадкым ышта. Тышке изижге-кугужге коньки дене мунчалташ погынат. Пошкудо ялла, эсогыл ола гыч толыт. Владимирлан йоча-влак лумым эрыкташ полшат.
У ий деч ончыч кожым кондат да моторын сӧрастарат, весела пайремым эртарат. Володян вий-куатше поро пашалан шуко-шуко ийлан ситыже, еҥлан порым ышташ кумылет ынже йом нигунам. Тиде кызытсе жапыште пеш кӱлешан, вет шукыштын саламлалташат шотышт ок сите.
Уло села калык суапле пашажлан Володялан таушта.
Галина Логинова.
Медведево район.
