Ирина Шибанаева, вуйлатышын секретарьже:
– Рис гыч ямдылыме кочкыш-влак поснак сымыстарат. Шукыж годым пловым ямдылем. Чыве шыл да поҥго гыч ыштыме плов поснак келша. Тидлан кок шоганым олым пырче семын пӱчкедем да кугу салмаште жаритлем. Тушко кубик семын пӱчкедыме чыве шылым пыштем, икмыняр жап гыч пластине семын падыштыме поҥгым, кутышын пӱчкедыме кешырым ешарем. Пакчасаска-влак чевер тӱсым налме, поҥго гыч уто вӱд пытыме марте жаритлем. Вара пловлан келшыше ик изи совла приправым пыштем. Тудым минут чоло ырыктем. Пелитр шолшо вӱдым опталам да шылым, поҥгым, пакчасаскам 30 минут наре тушитлем. Тушкак эрыктыдыме ик кугу чеснок пӱйым пыштем. Мушмо рисым салмашке пыштем. Лемже тудын деч ик сантиметрлан кӱшнырак лийшаш. Рисым варыман огыл, изи тулышто пел шагат наре шинчыктыман. Тылеч вара сайын пудыратыман да петыртыш йымалне 15-20 минут наре кучыман.
Роза Юдина, корректор:
– Ме колым кочкаш йӧратена. Идалык ончыч интернетыште ик рецепт шинчамлан пернен. Тудын почеш колым шинчалтен ончаш кумылаҥынам. Келшен. Тылеч вара эре ты рецептлан эҥертем. Тидлан 2 скумбрий, 0,5 л вӱд, 2 кугу совла шинчал, 1 кугу совла сакырложаш, 1 кугу совла горчице (пырчан), 1 кугу совла нӧшмӱй, 2 гвоздике, пел изи совла кориандр, пел изи совла тыгыдемдыме шем кочо пурыс, 1 лавр лышташ кӱлыт.
Кылмыше колым ужашлан пӱчкедем. Тылеч ончыч рассолым шолтем, йӱкшымеке, тудым кол ӱмбаке опталам да ик суткалан йӱштӧ верыш кораҥдем. Эрлашыжлан кочкашат ямде. Шуко палымем-влакланат моткоч келашю
Надежда Лаврентьева, обозреватель:
– Кавказ калык кочкыш долма нерген ончыч нимат пален омыл, но тений тудым икымше гана кочкын онченам, вара мӧҥгыштӧ йолташем дене пырля ыштенна. Тудым ямдылаш виноград лышташ, кинза, ушкал шыл гыч ыштыме фарш, рис, шоган, ушкал ӱй, чеснок, хмели-сунели приправе, базилик, тыгыдемдыме кочо пурыс, укроп, петрушко кӱлыт.
Эн ончыч кинзам, петрушкым, укропым, шоганым блендерыште тыгыдемдена. Вара тудым фарш да рис дене варена. Тушко тӱрлӧ приправым, шинчалым, вӱдым ешарен, чыла сайын лугена. Виноград лышташым шокшо вӱдыштӧ лазыртымеке, ямде вартышым голубцы семын пӱтырен, кастрюльыш йыгыре опташ тӱҥалына. Долмам шолтымо годым нуно ынышт рончалт манын, коклаштышт верым кодыман огыл. Кажне лончым вес виноград лышташ дене петырыман, коклашкышт ушкал ӱйым йыгыман. Пытартышлан вичкыж талиҥга дене леведман да изи тулышто шагатат пеле шолтыман. Долмам мацони соус дене кочкаш пеш тамле.