Марий мурызо Татьяна Кибаева пытартыш жапыште блогер семын палыме. Тудын Ютубысо «Атмосфера счастья» каналжым 140 тӱжем еҥ эскера. Таня ешан, кок икшыван ава. Йошкар-Олаште ила. Йоча дене мӧҥгыштӧ шинчыме пагытыште блогым вӱдаш эшеат кумылаҥын. Кызыт мурызо шке каналыштыже илышышже да шонымашыже-влак нерген тӱрлӧ видеом вераҥда. Кажне видеожым 20 тӱжем утла еҥ онча.
Шукерте огыл Татьяна подписчикше-влакым у паша дене куандарыш, «Кол» мурылан клипым савыктыш. У муро Интернетыште тыманмеш шарлен. Кызыт ты клипым 50 тӱжем наре еҥ ончен. Мурылан мутым да семым Т.Кибаева шкеак возен.
– Мурым возаш шонымаш иканаште чонем авалтыш. Варажым мый кажне вере диктофонеш муро савыртыш-влакым возен коштым. Вара Олег Славиным аранжировкым возаш йодым. Могай семӱзгар-влак лийшаш улыт, могай стиль – чыла умылтарышым. Тыге «Кол» муро шочо. Мылам муро лӱм вик келшыш. Вет чылан «кол» манмым эн ончычак «рыба» манын шоналтат. Такшым тудо «услышь» манмым ончыкта.
Муро-влак возалтыт. Лишыл жапыште, а чынрак гын, 15 апрельыште, эше ик мурым аклаш луктам, – каласкалыш Таня.
У мурылан клип: