Игорь Попов, Йошкар-Ола:
– Изиэм годым Човыксола ялна воктене кол пӱя лийын. Тушто каракам да карпым шуко кученна. Мыйын рекордем: ик йыл дене шым колым кученам.
Такшым мый ала-могай кугу колызо омыл. Сандене вӱд воктеке тарваныме деч ончыч ялысе колызо-влак деч кол чӱҥга але укем умылем. Нунын огеш чӱҥгӧ гын, «дуракам везёт» манын ӱшанен, кол кучаш тарванем.
Пытартыш жапыште Лемде эҥерыш чӱчкыдын волем. Жап улмо годым эрденат, кастенат кошташ тыршем. Кечывалым вӱд воктеке кошташ жап уке, паша шуко. Адакшым эрдене але кастене кол сайынрак чӱҥга. Колым кучаш кайыме годым утыжым ала-мом ом ямдылкале. Кинде шултышым, эҥырварам налам да ошкылам веле. Пытартыш жапыште йылымат ом кӱнчӧ: олаҥге эҥерыште йомын, а юрдийым эрыкташ ом йӧрате. Кинде дене шереҥге, турыш сайын логалыт. Тыгак шудышырчык дене кол сайын чӱҥга. Кызытше нуным сер воктенак верешташ лиеш. Кучымо годым изи кол-влакым закидушкыш пижыктем: тыге кугурак колым сымыстараш пеш йӧнан.
Такшым эҥер воктеке вуйым кандараш, пӱртӱсыштӧ каналташ коштам, но кол деч посна мӧҥгӧ пӧртылаш ом йӧрате. Садлан, кучыде, мӧҥгеш ом тарване. Шукыж годым кучымо колемым шкеак эрыктем, южгунам – авам але пелашем. Шӱрашан мелна дене кол шӱрым, коҥгаште тушитлыме, салмаште жаритлыме колым йӧратем. Шукерте огыл тыгыде кол дене котлетым ыштенна.