Кокымшо ешем лийын…

Александр Петров, «Кугарня» газетын 2004-2009 ийласе тӱҥ редакторжо:

— 2004 ийыште мый Марий ГТРК-ште увер пӧлкаште пашам ыштенам. «Кугарня» газетын тунамсе тӱҥ редакторжо Эрик Алексеевич Петров мый декем ятыр гана тудын олмеш кодаш манын йодаш толын. Шкеже тора Чукоткыш журналистлан пашаш кайынеже, ӱжмашат толын, а олмешыже иктаж-кӧм муаш йодыныт. Мый ондак тореш ыльым: телевиденийыште пашам келшен, газетыште мом ышташ тӱҥалам манын шоненам. Вара кӧнышым. Тольым редакцийыш, а тыште ӱдыр-влак веле пашам ыштат. «Ӱдыр полкышто пӧръеҥат лийшаш», шоналтышым. Ик жап гыч коллективышкына эше ик пӧръеҥ ушныш: «Марий Эл» газетыште ӱмыр мучко журналистлан ыштыше Владимир Ильич Изергиным корректорлан нальым. Тудым мый «коштшо энциклопедист» семын пагалем ыле. А шке семынем тӱҥалтыште шоненам: «Изиш ыштен ончем газетыште да каем тышеч». Но пашашке кӱлынак пижым. Шоненам: ӱдыр-шамычым тыге ондален кодаш ок лий. Нуно вуйлатышылан ӱшанат. Шкештат моткоч пашаче, уым кычалше, шке сомылыштым йӧратыше журналист улыт. Тыште шке кокымшо ешемым мумо гай чучын.

Тунам уло редакцийлан 3 тошто компьютер веле ыле. Статьям машинке дене печатлен толашат. Тыге ок лий, шонем. Шканем задачым шындышым: тыште компьютеризацийым ышташ. Эн ончыч вёрсткым ышташ чапле компьютерым нална. Тоштыжым журналист-влаклан текстым погаш колтышна. Вара кум тошто компьютерым налын ачалышна. Тыге кажне кабинетыште ик компьютер дене лие. А жап эртыме семын у компьютер-шамычым налаш тӱҥална. Кабинетлаште мебель пеш тошто ыле. Икана колам: СТС каналыш ВГТРК телевидений гыч чапле кабинет-влакым войзаш толыт, а контраст семын «Кугарня» газетыш войзаш пурен лекнешт: ончалза, кузе СТС каналыште сайын илат, а «Кугарняште» – шӱкшын. Тидым пален налмеке (кеч мыйын мебельым вашталташ план лийын), лишыл жапыштак чыла у мебельым ыштышна, кондиционер, элетрокоҥга-шамычым нална. Шке пашаеҥ-шамычым шӱжар семынак йӧратенам да нунылан чыла условийым ышташ тыршенам.

Тылеч посна ме идалыклан кум-ныл гана концерт-влакым эртараш тӱҥална: «Воштылаш, товатат, сулык огыл» мыскара фестиваль деч посна 14 февральыште Йӧратыше-влакын кечыштлан, шыжым ретро, мыскара муро концерт-влакым эртаренна. Погынышо оксам пашеҥ-шамычын пашадарышкышт колтем ыле. Шкенан «Кугарня» ансамбльым почна. Марий Эл радиоштат икмыняр мурына йоҥга. Коллектив дене чӱчкыдын канаш лектына ыле. Шарнем Шереметев замокыш мийымым, Юл воктене изирак пикникым ыштымым. Тыгак Озаҥыш, Раиф монастырьыш чумырген коштмат чылалан келшен.

«Кугарня» газет редакцийыште пашам ыштымаш мыланем эн ончыч вуйлатыше семын опытым пуэн, тыгак коллектив дене пашам ышташ тунемынам, журналист семын «Рудӧ прессе» лаштыкым лукташ темленам да шкежат «Марий калыкын историйже» лаштыкым ямдылаш тӱҥалынам.