Кужэҥер район Памашнур ялыште шочшо Елена Рябинина шочмо аважым вич ияш улмыж годымак йомдарен, а ачажым тудо улыжат ик-кок гана веле ужын. Азапыш логалше изи ӱдырым Нурсола ялыште илыше кокаж ден чӱчӱжӧ Татьяна Александровна ден Александр Аркадьевич Паймеровмыт ончаш налыныт. Кызыт Еленалан 22 ий, тудо кок шочшан ава да ӱшанле пелаш. 2020 ийыште Елена Рябининалан Кужэҥер посёлкышто пачерым пуэныт.
Ава деч посна
Ава пелен пызнаш, тудым ӧндал-шупшал колташ, «авай» манын ойлаш – кажне йочалан таҥастараш лийдыме кугу пиал. А Елена шочмо ава пелен илен, тудын чон шокшыжым шижын шуктен огыл. Аваже 22 ияшак илыш дене чеверласен. Сандене вич ияш ӱдыр изинек ойго дене вӱдылалтын, илышын кочыжым умылен. Жап шуко эртен, аважын чурий сынжым, ойлен колтымыжым ынде мондашат тӱҥалын.
– Авам 17 ияш улмыж годым мыйым ыштен. Ачам Кужэҥер кундем гычак. Тудын – шке ешыже, шочшыжо-влак. Ачам нерген шукыжым ом пале. Икана кеҥежым мемнан деке унала толмыжым шарнен кодынам. Тетла тудым пешыже ужын омыл.
Утларакшым кочам ден ковам пелен кушкынам. Авамын колымыж деч вара куд ияш улмем годым авамын акаже, шочмо кокам, пелен илаш тӱҥальым. Ме эн ончыч чӱчӱмын шочмо суртыштыжо, Нурсола ялыште, иленна, варажым пошкудо Ӱштымбал ялышке кусненна. Ешыште мый дечем кум ийлан кугурак Рома эргышт кушкын. Туддене эре пырля модын куржталына ыле. А варажым Илья шочо. Тудым ончаш кокайлан чӱчкыдын полышкаленам.
Шочмо ача-ава деч посна кушкаш йӧсӧ гынат, ты ешыште сайын иленам. Мо кӱлеш – мыйын чыла лийын. Нуно йочапӧртыш пуэн огытыл, а шке ончен куштеныт, тыгодым весела йоча пагытым пӧлекленыт. Сандене кокам ден чӱчӱмлан тачат тауштем, – мане Елена.
Умбакыже 3 июньышто лекше у номерыште лудса.