Кок сержантлан – таумут

Марий Элысе МВД-ште эртыше кечылаште плановый совещаний эртаралтын. Тушко Россий ФСИН-ын республикысе управленийжым вуйлатыше Игорь Третьяков ушнен. «Республикысе силовой ведомство-влак коклаште пеҥгыде кыллан кӧра правам шуктымо шотышто паша лектыш куандара», – палемден элгӧргӧ министерствым вуйлатышын пашажым жаплан шуктышо Алексей Коновалов.

Ик тыгай примерым И.Третьяков конден. Тудо торжественный обстановкышто ППС-ын посна батальонжын кок пашаеҥжылан таумутым кучыктен. Полицийын кугурак сержантше-влак Виталий Иванов ден Сергей Шакиров патрулирований годым Йошкар-Олаште ик еҥым кученыт. Тудо законым пудыртымылан мутым кучымо деч шылын коштын да розыскышто лийын улмаш.

ППС экипажын пашаеҥже-влаклан И.Третьяков таумут дене пырля ойыртемалтше пӧлекым – 6-шо №-ан исправительный колонийысе осуждённый-влаклан паша адаптаций рӱдерыште ыштен лукмо шампур наборым – кучыктен.

Фотом Марий Элысе МВД-н сайтше гыч налме.