Агротуризм
2023 ий 4 ноябрь гыч 2024 ий 12 апрель марте Москошто ВДНХ-ште «Россий» тӱнямбал кӱкшытан выставке-форум эрта.
Тушто элнан экономикыжым вияҥдаш полшышо тӱрлӧ отрасльым сеҥымашышт гоч почын ончыктат. Нунын коклаште Марий Элынат ятыр сеҥымашыже ончыкталтеш. «По экологическим тропам к фермерской кухне» туристический маршрут дене Марий Элысе ялозанлык министерстве ден Республикысе компетенций рӱдер палдараш тӱҥалыт. Ты маршрут ялозанлык туризмым вияҥдаш полшышо кок проектым иктыш уша. «Каменная гора» пӱртӱс заказникын ойыртемже нерген каласкалат, тыгак «Золотой нектар» отар, «Уна кудо», «Экопарк «ЗаАзяково» дене палдарат. Тыгодым сырым ямдылымым тӱҥалтыш гыч мучаш марте ужаш да тамлен ончаш йон лиеш.