Марий Эллан 100 ий темме идалыкыште республикысе ик эн ончыч ыштыме Т.Евсеев лӱмеш Национальный тоштерым уэмденыт.
Тений тоштер 100 ияш лӱмгечыжым палемден. Кок пайрем вашеш тӱҥ корпусышто ятыр пашам ыштеныт: окна-влакым вашталтеныт, пырдыжым тӧремден чиялтеныт, выставочный залым, фойем, гардеробым тӧрленыт. Чыла тиде сомыллан 14,5 млн теҥге ойыралтын.
16 декабрьыште уэмдыме тоштерыш А.Евстифеев миен коштын, ыштыме пашам аклен. Вуйлатышылан историй пӧлкан кугурак шанче пашаеҥже Сергей Свечников «Марий Эл Республикысе национальный тоштерлан – 100 ий» выставке нерген каласкален.
А.Евстифеев уэмдыме тоштерым да выставкым ончаш турист да Марий Элыште илыше еҥ-влаклан темлен. У ий каныш годым тоштер 2 январь гыч пашам ышта.