Марий муро аланыште тӱрлӧ профессиян еҥым вашлияш лиеш. Южо мурылан изинек шӱман кушкеш гын, весе вучыдымын ты корныш логалеш. Лаштыкнан тачысе унаже – Кужэҥер район Йырмарий ялын ӱдыржӧ, кызыт Моско воктене Люберцы олаште илыше да моторлык салонышто пашам ыштыше самырык мурызо Алина Иванова. Ӱмаште кеҥежым тудын «Пиалан лиям» икымше мурыжо лекте да калык коклашке писын шарлыш.
Тений ты муро Марий Эл Радион эртарыме «Идалыкысе муро» фестивальышкат логалын, хит-парадыште тудлан шуко еҥ йӱклен. Шукерте огыл июльышто Алина Иванова «Чоныштем – йӧратымаш» кокымшо мурым лукто.
Марий Элыште тудо чӱчкыдын лиеда, сандене ик кастене рӱдолаште тудын дене вашлийын мутланышна.
Вучыдымын мураш тӱҥалын
Мураш тӱҥалам манын, Алина ондак шоналтенат огыл. Чылажат трукышто ала-кузе лийын. Усталык корныш шогалаш тудлан семмастар Надежда Тимофеева-Кульшетова ден мурызо Наталья Глазырина полшеныт да ӱшаным пуэныт. Тыге, шоныдымын-вучыдымын, Алина Иванова калык коклашке лектын.
– Школыштат, колледжыштат шкетын ик ганат мурен омыл, концертышке, тӱрлӧ мероприятийышке пешыже ушнен омыл.
Наталья Глазырина – мыйын сай йолташ ӱдырем да родем. Композитор Надежда Тимофеева-Кульшетова денат палыме улам. Нунын тӱшкаш ушнымо дене мый мураш кумылаҥынам, шонем. Икана кумытын пырля вашлийынна ыле. «Мураш оҥай, мурым калык ончыко лукташ ыле» манын, тунам пелештенам. Надежда мыланем муралташ йодо. Мыйым тӱткын колыштмек мане: «Мураш мастарлыкет уло, мый декем вокал занятийыш тол». Чылажат тышеч тӱҥале. Тыге мый тудын деке вокал урокышкыжо кошташ тӱҥалым, сайынрак мураш тунемым. Варажым Надежда мыланем икымше мурым пӧлеклыш. Мутшым поэтессе Светлана Григорьева-Сото возен, семжым тудо шкеак келыштарен.
Марий Эл Радион «Идалыкысе муро» фестивальышкыже ӱжмыштлан чот куаненам. Тунам мый кугу сценыш калык ончыко икымше гана лектынам, изиш тургыжланенам. Мутат уке, тидлан чот ямдылалтынам, Москошто лӱмынак чапле костюмым налынам ыле. Тыгодым муро почеш подтанцовкым ыштенна .
Мыланем мурым почела-почела лукташ огеш келше. Мый кеч-могай пашаште эре качестве верч шогем. Тек шагал лектеш, но тудо сайын возалтше, вет мурым возаш жап шуко кӱлеш.
Муро мыланем ончыко каяш, илышыште пеҥгыдын шогаш полша, вийым ешара. Сандене чыла пашам ыштен шуктем. Ончыкылан гастроль дене кошташ кумыл уло. Илен-толын, шонымашем эркын-эркын шукталтеш, шонем. Но муро але шагал, сандене эше лукташ кӱлеш, – мане А.Иванова.
Йошкар-Ола гыч – Моско велыш
Кужэҥер район Шӱдымарий школышто 8-ше классым тунем пытарымеке, Алина Советский районысо Ургаш лицейыште медицине направлений дене тунемын, варажым – Йошкар-Оласе медколледжыште медсестралан. Дипломым налмеке, рӱдолаште верланыше Перинатальный рӱдерыште медсестралан вич ий ыштен. Варажым Йошкар-Оласе тӱрлӧ эмлымверыште тыршен.
Ятыр вере ыштен ончымеке, Алина бьюти-индустрийыште шкем терген ончаш кумылаҥын. Варажым тушко пӱтынек куснен. Тудо йодмо почеш ӱдыр-влаклан мотор шинчапуным шым ий ышта.
– Медициныште окса шуко огыл, сандене ты сферыш кусненам. Кугу пашадарым кычалын, Моско велыш илаш каенам. Ӱдыр-шамычым моторым ышташ йӧратем. Моторлыкым ыштыме салонышто тыршем. Шинчапуным кушташ шонышо шуко еҥ уло. Марий Элыштат, Москоштат йодыт. Каныш деч посна тыршаш логалеш. Но мыланем ты паша келша, тидлан кид тунем шуын, – каласыш тудо.
Шочшо – аван пиалже
Алинан пиалже – вич ияш Даша ӱдыржӧ. Ава шочшыжым нимо деч чот йӧрата, чон шокшыжым тудлан пӧлекла. Даша йочасадыш, тыгак спортивно-бальный куштымаш кружокыш коштеш. Аважым ончен, мурашат кумылаҥын. Тидыже Алинам куандара, ончыкылан мастарлыкшым вияҥдаш шона.
Пелашыже ик чоҥымо фирмыште вуйлатышын алмаштышыжлан ышта.
Нуно ешге Москошто экскурсий дене тӱрлӧ верым ончен кошташ йӧратат. Йошкар площадьыш, ВДНХ ончер комплексыш, зоопаркыш да моло верыш миен толыт.
Пашалан кожмак
Алина кеч-кунамат жапым пайдалын эртараш тырша. Його-влакым йӧршеш огеш йӧрате.
– Мыйын эре мом гынат ыштыме, ум пален налме шуэш. Изинек ача-авам пашалан туныктеныт, сандене яра шинчаш жапем лийын огыл. Кызытат лишыл еҥем-влак тидын шотышто ойыртемалтыт. Ачам мӱкшым куча, авам мӧҥгыштӧ шогылтеш, нуно вольыкымат ашнат. Сандене ялыште паша эре шуко. Пашам ыштыде диваныште шинчылтше-влак мыланем огыт келше, – мане А.Иванова.
Алина ончыкыжымат мураш да мастарлыкым нӧлташ шона. Йӱкшӧ тудын моткоч сылне. Сандене ончылно сеҥымаш-влак шуко лийыт манын ӱшанена. Алинан усталык корныжо лектышан лийже да шуко мурым калыклан пӧлеклыже!