Нефтекамск олаште шочшо да кызыт Сургут олаште илыше Наталья Шамыкаеван курчакым ышташ йӧратымыжым мотор «шочшыжо-влакым» войзымо снимке-влакым ужынат умылаш лиеш. Сӧрал курчакым кидыш налын, изи чукай семынак шыматыме шуын колта.
Наталья сылне курчак-влакым ыштылеш. Шкеже марлан каен. Кум ияш изи пачката ӱдыржӧ уло. Можыч, ӱдыржыланат кӧра шӱм-чонжо курчакым ыштылаш кӱштен.
«Иктаж кок ий ончыч ик курчак мастарын пашажым тӱслен онченам. Тудо тӱрлӧ куэм дене итерьерный манме курчак-влакым ыштылын, — каласкала Наталья. – Но ты сомылым тӱҥалаш але укем шуко жап шоненам. Вара шкеак ургаш шонен пыштенам. Тидлан кодшо ий тӱҥалтыште кӱлеш материал-влакым наледен кондышым. Но тылеч ончыч вургемым шулмо пашам, курчакым шымленам, курчакым ыштыме кидпаша шотышто ятыр курс ден видео-влакым онченам. Ик идалыкыште мылам йӧршӧ шулын пыштыме образецым, вургемын стильжым ойырен налынам. Тыге ынде ик ий утла курчак-влакым ыштылам. Тиде хобби мыланем путырак келша, эсогыл кызыт кажне кечын шуктымо сомылышкем савырнен».
Специальностьшо дене Н.Шамыкаева – историйым туныктышо. Нефтекамскысе 2-шо №-ан школ деч вара ты профессийлан оласе педколледжыште, Уфасе педагогический кугыжаныш университетыште заочно тунемын. А вара келшыме йолташ рвезыж дене пырля Йӱдвелыш илаш каяш кутырен келшеныт. Тыге 20 ияш Наталья шочмо Нефтекамск гыч Сургутыш кудалын. Сургутысо 1-ше №-ан школысо тоштерыштк пашам ышташ тӱҥалын.
Йоча дене шинчыме жапыште шӱм-чонжым куандарыше моло кидпашамат шуктен: ырес дене тӱрлен, пейзажым сӱретлен. Вара самырык авам куэм да тӱрлӧ лапчык дене сӧрал курчакым ышташ лийме кумыл авалтен.
Такшым Н.Шамыкаева кидпашам ыштыме кумыл денак эре илен, мастарлыкшым кӧргыштыжӧ арален манашат лиеш. Вет изиж годым ковайже тудым тувырым, сарафаным, юбкым ургаш туныктен. Школышто труд урокыш куанен коштын. Туныктышын «Куэмым, тӱрлӧ тӱсан шӱртым да имым кондыза» манме шомакшым вучен.
Наталья кузе курчакым ышта? Тидлан трикотаж куэм дене капкыл ужаш-влакым урген ямдыла, тушко синтепоным шӱшкын шында да нине ужаш-влакым ушкала. Вара хлопок але трикотаж дене вургемым ямдылаш тӱҥалеш. Курчаклан тувырым, комбинезоным, юбко ден блузкым але эше моло вургемым «чикта». Тудыжо лавырга гын, кудаш налын, мушкаш лиеш.
Ондак коваште але замш дене йолчиемымат шкеак ыштылын, ындыжым нуным кевытыште ямдым наледа. Курчакын вургемжым волгалтше тӱсан полдыш, тасма, стразе да моло тыгыде наста дене сӧрастара. Вара ӱпым келыштара, чӱчкыдынак ӱдырлан сылне заколкым але бантикым пижыкта. Тидлан кевытыште лӱмынак трессым налеш. Курчакшылан шляпам, упшым да моло вуйчиемым шке пидеш. Ик-кок кечыште 28 сантиметр кӱкшытан, шке шоген моштышо изи ӱдыр але эрге курчак «шочынат шогалеш». А шӱм-чоныштыжо каласен моштыдымо куан тул чӱкталтеш!
Кидмастар чыла курчакшым йӧрата. Южгунам могай лийшашым ончылгоч каласенат ок керт. Очыни, тидыже чонышто могай кумыл улмо дене кылдалтеш. Курчакше я волгыдо тӱсан тувырым чия, я сур-кӱреным. А заказ почеш ыштыме арверже шотышто озан йодмыжым шукта.
«Ты сомыл чонемлан моткочак келша. Кажне курчакем шкешотан! Чылаштымат йӧратен ыштем да йӧратен шындем. Ӱдырем ден пелашемат кумылемым нӧлталын моштат, мокталтат. Йолташем да палыдыме еҥ-влакын пашам-влакым куанен ончымышт, поро шомакышт ончыкыжымат мастарлыкым шуараш таратат», — ойла эрвелмарий ӱдыр.
Кызыт Н.Шамыкаеван интерьерный курчакше-влак Сургутышто, Уфаште, Москваште, Йошкар-Олаште, Краснодар крайыште, Ростов областьыште да шуко моло вереат «илат». Шукерте огыл кок пашажым Испаний марте «ужатен». Марий ӱдырын курчакше-влакым ты шокшо элыште илыше самырык мужыр налын. Шамыкаевмыт иктаж-гана Испанийыш миен толаш шонат.