29 июнь – Российыште партизан да подпольщик-влакын кечышт. Лач ты кечын 1941 ийыште СССР Калык комиссар-влакын советышт да ЦК ВКП(б) тушман тылыште партизан отряд ден диверсионный группым ыштыме шотышто директивым луктыныт. Кугу Отечественный сар годым тушман тылыште 6 тӱжем утла партизан отрядыште миллион наре еҥ кредалын. Нуно ик миллион утла тушманым пытареныт да пленыш налыныт, 4000 утла танкым да бронемашинам, 65000 автомобильым, 1100 самолётым пытареныт, 1600 кӱртньыгорно кӱварым локтылыныт, тыге 20000 немыч эшелон рельс гыч кораҥын.
Шӱдӧ тӱжем дене партизанлан кугыжаныш наградым пуымо. Нунын кокла гыч 249 еҥ Совет Ушемын Геройжо лийын, а кок партизан командир – Сидор Артемьевич Ковпак ден Алексей Федорович Федоров – ты лӱмым кок гана сулен.
Ирина ЗОЛОТАРЁВА.