Ныл ий ончыч чот черланенам. Логарем корштен, нимогай эм дене тӧрлаташ лийын огыл, тыге ик ий наре орланенам. Эрта манын шонен, врач дек каен омыл, паша верыштат мыйым нигӧ алмаштыше уке ыле. Черланымеке, иктаж пел ий гыч йыжыҥем корштен пуалаш тӱҥале. Кынелынат кертын омыл, пуйто капысе чыла лу корштен. Тунам веле эмлымверыш полышым йодын каенам. Но врач-влак я ик диагнозым, я весым шынденыт.
Мо лийынам, могай чер мыйым авалтен манын, шке семынем эре шонкаленам. Вара шарналтенам: черланымем деч ончыч кажне йӱдым гаяк омыштем кок кишке конча ыле. Ялна воктенысе чоҥгата вер гыч питон гай кок кугу кишке мый декем нушкеш: иктыже нарынче, весыже ужарге да изирак. Нунын деч утлаш тӧчен, талын куржам, но кишке-влак мыйым поктен шуыт, да кугуракше йолем чӱҥгалеш.
Такшым кишкым омышто ужаш сайлан огыл, маныт. Омем нерген авамлан каласкаленам. Тудо мыйым моштышо ӱдырамаш дек наҥгаен. Садыже мыйым локтеныт, манын. Локтышо ӱдырамашыже мемнан ялыштак ила, адакшым шкетын огыл осалым шона, ӱдыржат тыгаяк, палдарен тудо. Йӱшаш вӱдешем «ыштеныт» улмаш, садланак логарем коршташ тӱҥалын. Мужедше ӱдырамаш мыйым чаманен да полшаш кӧнен. Но чер деч тӱрыснек утарен ом керт, лач осалжым гына кораҥдем, манын тунам.
Тудо йӱдымак омыштем адак саде кок кишкым ужынам. Ындыже нарынче кугу кишкын «шӱргыжат» раш коеш – ик пӧрт коден илыше пошкудо ӱдырамаш. Тудо мемнан дек чӱчкыдын коштеш, я иктым йодын толеш, я весым. Шкежат мыланна иктаж-мом конда. Но ты гана омыштем кишке деч лӱдын куржын омыл – ваштарешыже шогалын, почшым кольмо дене руалынам.
Вес кечынжак пален нална: пошкудо ӱдырамаш йолжым туген – тошкалтыш дене волымыж годым йоҥылыш тошкалын улмаш. Молан нуно мыланна осалым шонат, умылен кертын огынал. Пеш поянжат огына иле, но ешыштына чылан келшен, ваш пагалена. Тидлан кӧранат мо вара? Тудо омо деч вара эркын дене паремаш тӱҥалынам.
ЛИДИЯ.
Советский район.
freepik сайт гыч налме фото.