Марий Элысе Кугыжаныш Погынын Председательже Михаил Васютин 12 августышто шке избирательный округыштыжо паша кечым эртарен. Курыкмарий районысо «Дарование» школ-интернат, 1-ше №-ан школын «ушан» спортплощадкыже, Козьмодемьянскысе модельный книгагудо, Микрӓк да Виловатыште тунемме тӧнеж-влак – парламентым вуйлатыше нине да моло объектыште чоҥымо да олмыктымо пашам ончен савырнен.
Козьмодемьянск олаште «Дарование» школ-интернатыште столовыйым олмыктымым терген.
Тӱвыра поянлык объектлан шотлалтше 1-ше №-ан школышто окнам вашталтыман. Тидын шотышто республикысе Тӱвыра министерствыште кӱлеш консультацийым эртарат, йодышым рашемдымым тергаш тӱҥалыт.
Козьмодемьянскысе 1-ше №-ан школышто «ушан» площадкым да Виловат школ кумдыкышто верланыше ГТО нормативлан ямдылалтме да сдатлыме площадкым ямде улмыштым терген. Нуным «Бизнес-спринт (Я выбираю спорт)» да «Развитие физкультуры и массового спорта» федеральный программе-влаклан келшышын чоҥат. Виловат школышто футбол пасум регионысо да регион-влак коласе таҥасымаш-влакым эртараш сертификаций шотышто йодышым шке тергаш тӱҥалам манын палемден М.Васютин.
Кугыжаныш Погын Председатель тыгак Козьмодемьянскысе модельный книгагудышто лийын. Тушто «Культурная среда» федеральный проектлан келшышын учрежденийым уэмдат. Тиде ончыкыжым тӱвыра, туныктымо рӱдер веле огыл, тыгак вашлиймашым эртараш, опыт дене ваш пайлалташ, усталык мероприятийлам эртараш келыштарыме вер лийшаш.
Микрӓк кыдалаш школым капитально олмыктымымат парламент вуйлатыше шке терга. 504 верлан келыштарыме школым 1991 ийыште почмо. Олмыктымо пашам «Молодёжь и дети» нацпроектлан келшышын шуктат. 1 сентябрь марте уэмдыме школ тунемшыже-шамычлан омсажым почеш.
М.Васютин Курыкмарий драмтеатрыштат лийын да тушто тыршыше коллектив дене вашлийын.
Козьмодемьянскыште паша дене лиймыж годым Михаил Васютин кок еш дене вашлийын. «Собери ребёнка в школу» Российысе акцийлан келшышын, тудо СВО-што вуйым пыштыше салтакын Наталья Подузова пелашыже да Иван эргыже, тыгак шуко шочшан ава Светлана Петрова (тудын Тимур эргыже тений 1-ше классыш кая) вашлийын да канцеляр сатум кучыктен.
13 августышто Марий Эл Кугыжаныш Погын Председатель М.Васютин да тудын алмаштышыже А.Смирнов паша дене Советский районыш миен коштыныт. Районысо депутат-влак дене паша лектыш да районым ончыкыжымат вияҥдыме нерген каҥашеныт.
Депутат-влакын районысо собранийыштын 11-ше сессийыштышт Советский районын 2025-2027 ийлан бюджетышкыже, тыгак муниципальный погым приватизироватлыме шотышто тенийысе прогнозный планыш да моло документыш вашталтышым пуртымо нерген пунчалым луктыныт.
Кугыжаныш Погынын кызытсе созывшын депутатше-влакын инициативыштымат онченыт. Иктыже – пакчасаскам перерабатыватлыме сатум 10% ставкан НДС-ым тӱлыман продовольствий спискыш пуртымо шотышто, кызыт ты ставке – 20%.
Республикысе парламентым вуйлатыше тыгак приёмым эртарен. «Единый Россий» партийын Советский районысо пӧлкажын активше, СВО участник-шамычын гуманитарный полышым чумырышо ешышт дене вашлийын, районысо икмыняр тӧнежыште да объектыште лийын, «У Илыш» СПК-н пашажым ончал савырнен.
Марий Элысе Кугыжаныш Погынын пресс-службыжын фотожо-влак.