Марий Элын калык артистше Станислав Шакиров шукерте огыл муро аланым у пашаже дене пойдарен. Кок йылме дене йоҥгалтше «Виче воктен» муро почеш войзымо клип марий-влаклан веле огыл, тыгак башкир калыкланат сай пӧлек лийын. Молан лачак башкир йылмым ойырымылан ӧраш нимолан, вет Станислав Шакиров тыгак – Пошкырт кундемын сулло артистше.
Палемдыман, кумдан палыме мурызо концертлаштыже ончычат марла веле огыл, тыгак рушла, татарла мурен. А ынде колыштшо-влак башкирла мурымыжымат колын кертыт. Ӱшанена, «Виче воктен» у муро кок калык коклаште келшымашым ончыктышо шкешотан гимныш савырна.