Кок ийыште ныл школым чоҥат, тушто 2710 вер лиеш. Тидын нерген 21 апрельыште Марий Эл Республикысе Правительствын заседанийыштыже туныктыш да шанче министр Лариса Ревуцкая каласкален.
Проект почеш Йошкар-Олаште 825 веран кыдалаш школ ден Килемар район Кугу Памъялыште 60 веран тӱҥ школ (туштак 20 веран йочасадым келыштарат) лийшаш улыт. Инвестор-влак тунемме верлам чоҥат, нуным оборудований дене йӧнештарат, тыгак договорын срокшо мучко ты объектым технически обслуживатлат.
Тылеч посна «Развитие образования» Российысе кугыжаныш программе почеш Йошкар-Олаште 1100 веран да Медведево районысо Руэм посёлкышто 725 веран школ-влакым чоҥаш планыш пуртымо.
Л.Ревуцкая «Образование» нацпроект нерген каласкалымыж годым ушештарен: кок школым – Марий Турек район Сардаялыште да Медведево посёлкышто – палемдыме срок деч ончыч сдатлыме. Тыгак нацпроект почеш тений 1 сентябрьлан у инфраструктуран 119 объектым почшаш улыт.
Тений «Точка роста» манме 22 у рӱдерым ышташ палемдыме. Йошкар-Оласе 29-ше №-ан школышто «Кванториум» йоча технопаркым ямдылат. Тыгак лишыл жапыште Политехнический лицей-интернатыште «IT-куб» цифровой образований рӱдер почылтшаш. Цифровой образовательный средам шыҥдарыме шот дене 37 школлан у компьютер оборудованийым налыт.
Йоча-влаклан ешартыш образованийым пуышо у 1534 вер ышталтеш. Начар тазалыкан икшыве-шамычлан сай шинчымашым пуымылан кугу тӱткыш ойыралтеш. Кужэҥер районысо Руш Шой ден Йошкар-Ола воктенысе Савинысе школ-интернатлаште материальный базым уэмдат.
Инноваций программе дене келшышын, 2026 ий марте республикысе 102 школым капитально олмыктышаш улыт. 2022 ийыште Шернур районышто кум школым да Медведево районышто ик школым капитально ачалаш оксам ойырымо.
Шокшо кочкышым пукшымо шот дене паша Килемар район Йӱксӓр кыдалаш школышто ышталтын. Тушто пищеблокым чоҥен пытарыме. Кызыт тыгаяк паша Оршанке район Кугунур школын пристройыштыжо шукталтеш.
Тунемме верлам нӧлтымӧ паша нерген Марий Эл Республикысе чоҥымо паша, архитектур да ЖКХ министр Михаил Степанов каласкален.
Марий Элым вуйлатыше А.Евстифеев район ден ола администрацийым вуйлатыше-шамычлан, 20 август марте капитально олмыктымо пашам мучашлаш манын, контрактыште палемдыме срокым шукташ кӱштен. Шернур район Мустай да Оршанке район Лужбеляк школлаште 11 май марте контрактым ыштыман.
Д.Речкинын фотожо.