Тиде 15 ияш улмем годым лийын. Ача-авам пашаш каеныт ыле. Шкетын йокрокланаш огыл манын, кок йолташ ӱдырем уналыкеш ӱжым. Кеҥеж кече, игече моткоч шокшо шоген. Ме кумытын телевизорым ончышна, чайым йӱын, кутырен шинчышна. Мыйым кенета омо темдаш тӱҥале. Диванысе кӱпчыкыш вуем пыштышым гына – нералтенат колтышым.
Мален кием. Шижам, чот пӱжалтам. Ӱпем, вургемем йӱштӧ пӱжвӱд нӧртен. Шкеже пеш лӱдынам. Капем тарватен ом керт, кид-йолемат ом шиж. Лӱдмем дене шинчам почым. Ончылнем шем вургеман палыдыме айдеме шога. Лӱдмем дене кычкырал колтынем, но ом керт – йӱкем пуйто уке. Саде айдеме мыйым тугак тура ончен шога. Мый пӧлем гыч лектын куржнем, йолташем-влакым шӱдынем, но нимом ыштен ом керт. Кенета саде айдеме йолышкем шинче да вачем темдаш тӱҥале. Тиде жапыште уло кертмем дене кычкырал колтышым. Мо лийынат манын, йолташ ӱдырем-влак пӧлемыш куржын тольыч. Саде айдеме пуйто лийынат огыл.
Ӱдыр-влакын каласкалымышт почеш, мый шагат наре маленам. Мыланем мешаяш огыл манын, омсам петырен, кухньыш каеныт. Лӱдын кычкырымем колын, куржын толыныт, а мый кагаз гай ошемынам. Тунам шучко омым ужынам манын шоналтышна, да тиде историй вашке мондалтын.
Кок ий гыч уэш тыгай томаша лийын. Кеҥежым кум шагат эр марте сериалым онченам. Малаш возымат, капем ом шиж, тарванен ом керт. Ты гана саде айдеме воктенем ончен гына шинчен. А вара йомын. Мыланем чыла тиде умылыдымаш 10 минут эртыме гай гына чучын. Шагатыш ончальым – куд шагат. Мо тиде лийын, кызытат ом пале.
С.Крылова. Кужэҥер район.
Интернет гыч налме фото.