СВО-шко черетан грузым колтымо годым Марий Эл Республикысе промышленность, экономикым вияҥдыме да торговльо министерствын экономикыште кугыжаныш радамлымаш пӧлкажым вуйлатыше Максим Игоревич Карташов дене мутланышна. Тудо тыгерак каласкалыш:
– Ме элнаш пурышо ныл у республикышкыжат гуманитарный полышым колтена. Кӧмыт мемнан деч полышым йодыныт, чыла шуктенна. Кеч тудо мобилизоватлыме, доброволец да контрактник лийже. Посылкым кумылан еҥ-шамыч, служитлыше-влакын родо-тукымышт погат. Кугурак ужашыжым Марий Эл Республикын Правительствыже ден район-влак чумыреныт. Эн ончыч чыла терген лектынна. Варажым кок фурым грузитленна. Нуным кок направлений дене колтена. Иктыжым – тичмашнек Лисичанскыш, весыжым – Донецк ден Луганск Республиклашке, Херсон ден Запорожье кундемлашке. Могай частьлаште мемнан рвезе-влак служитлат, тушто кодат. А мом вигак намиен огыт шукто адресат деке, ты шотышто посна мутым кучышо еҥым палемдат, варажым нуно пуышаш улыт.
Мом ме тушко наҥгаена? Автомобиль гыч тӱҥалын носки марте. Тиде – неле техникым, квадракоптерым, тепловизерым, инструментым, бензопилам, газовый горелкым, печкем, тӱрлӧ машиналан шапаш ужаш-влакым.
Специальный военный операцийын участникше-влак мо кӱлмӧ шотышто волонтёр-влак да Марий Элым Вуйлатыше декат лектыт. Тидым радамлымеке, мо кӱлешым кычалына, муына, налына. Срок шотышто шуктышаш улына. Кажне посылкыш кушко кӧлан колтышашым возена. Трук йомеш гын, варажым садак тудым муына, вет кажныжын шкенжын номерже возалтын.
