Пелашем дене 15 ий иленна. Университетым тунем пытарымеке, Аркадий дене ушненна да мариемын ялышкыже илаш кусненна. Пелашем ик озанлыкыште агрономлан ыштен, мый школышто руш йылмым туныктенам. Кок пачашан кермычан пӧртым нӧлтен шынденна. Варажым эргына, ӱдырна шочыныт. Кызыт Кирилл ден Катя школышто тыршен тунемыт.
Пелашемым 15 ий аклен, пагален иленам. Тудо ик ганат мыйым мыскылен огыл. Кеч-куштат, кеч-кунамат арален налын. Еш илышем шотышто нимо удам ойлен ом керт. Тынар ий пырля илымеке, ме чот лишыл еҥыш савырненна. Но ик ойго марием шотышто шонымашым вашталтен.
Ик кеҥежым сурт воктекем, кок изи икшывым вӱдалтен, самырык ӱдырамаш толын шогале. Эргыже 7 ияш, ӱдыржӧ 4 ийым темыше лийыныт. Ондак ты самырык вате иктаж родыжым тыште кычалеш манын шоненам. Но йоҥылыш лийынам. Тудо Аркадийым кычал толын. Тудо ӱдырамаш – пелашемын кокымшо ватыже, а нине йоча-шамыч тудын икшывыже-влак лийыныт. Ты уверым колын, изиш мландыш волен шинчын омыл. Мыйын Аркадием иканаште кок мераҥым поктылын улмаш. Вес олашке чӱчкыдын командировкыш пуйто коштын…
Тынар ий, чыным палыде, мариемлан ӱшанен иленам. Тиддеч вара мылам ынде кузе лийман? Мом ыштыман? Тӱрлӧ шонымаш вуйыштем пӧрдеш, йӱдшӧ-кечыже чонем туржеш. Кирилл ден Катя ончылно ача мом ойлышашым огеш пале. Мыйын ӱмбакемат ончаш вожылын.
Пелашемым тачат проститлен ом керт. Кузе тудо мыйым тыге ондален кертын? Тачат ӧрам. Вургемжым погалтен, вес вате деке илаш каен.
Снежана.
Шернур район.