«Российын эн спортивный ешыже» онлайн-конкурсышто Марий Эл гыч кок еш таҥаса.
Марий Турек район Эҥерӱмбал ял гыч Гульнара ден Марсель Насыровмыт кум ӱдырым да ик эргым ончен куштат. Пӧръеҥ администрацийыште пашам ышта, тренер. Пелашыже – степ-аэробике дене тренер. Икшывыштат спортлан шӱман кушкыт.
Морко посёлко гыч Ольга ден Андрей Николаевмыт шке жапыштыже дзюдо да куштылго атлетике дене заниматленыт. Роман эргышт куштылго атлетикыште шуаралтеш гын, Игнат – иймаште.
Конкурсышто сеҥыше-влак 15 декабрьыште пале лийыт. Нуным Москошто пайремлын саламлат.