манеш кок эргым шкетынак ончен куштышо ава Т.М.Катькова.
Тамара Михайловна Советский район Шнаран селаште ила. Тудлан кок эргым шкетын гаяк ончен кушташ пӱрен улмаш. Кызыт куд уныкан (кум ӱдыр да кум эрге) кова.
Кугурак эргыже Андрей Челябинск областьыште контракт почеш служитла. Шукерте огыл тудым лач ик арнялан канаш колтеныт. Тыгодым мончашке пуреныт да вийым погеныт. Ты жапыште Андрей Смирнов аваж дене кутырашат жапым муын. Адакат Луганск Калык Республикысе Кременской районыш наҥгаеныт. Танковый ротым вуйлата. Званийже дене – старший сержант.
12 июльышто ава кокымшо эргыжымат Украиныш СВО-ш ужатен. Аваже тидын нерген тыгерак каласкалыш:
– 38 ияш Павел эргым кум шочшан ача гынат, тушко каяш мыняр чарышым гынат, ыш колышт, кайыш. Кызыт Челябинск областьысе Чебаркульышто учебкыште, тышеч Москош да варажым Луганскыш наҥгаят, мане.
«Мыйын кочам Кугу Отечественный сарыште кредалын, тукым иза ден шольо-влак (изамын да акамын эргышт), шочмо изам кызыт спецоперацийыште улыт, а мыйже мо дене нунын деч ойыртемалтам, посна омылыс, мыят кертам», – каласыш мыланем. Ты шотышто военкоматышкат коштым. Тушто «Ме вет огына колто, шке кумылын кая, изи огыл, шкаланже шке пунчалым луктын» манын вашештышт. Каяш манын, пеҥгыдынак шонен пыштен да кайыш.
Андрей эргымын ешыже Челябинск областьысе Миасс олаште ила. Кок ият пелаш йыгыр эргыже-влак кушкыт. Тыгак тылеч ончыч шочшо ӱдыржӧ уло.
Ава эрге-шамычын изишт годым верысе озанлыкыште поварлан пашам ыштен. А пенсийыш лекмыж деч ончыч Москошко кудалыштын. Тушто ик унагудышто консьержкылан пашам ыштен, варажым ВДНХ-ште йоча аттракционышто билетым ужален.
Ава шке эргыже-шамыч верч ойгыра. Кокымшо эргыжын спецоперацийыш каяш тарванымекыже, тӱрлӧ вере коштын. Но Павел Пиркин, пелашыж дене ойырленат, тыгай корным ойырен налын – Шочмо эллан служитлаш.
Тамара Михайловнан кугурак эргыже 2004 ий годсек контракт почеш служитла, Чечняшке кок гана миен толын. А.Смирновын служитлыме военный частьше Челябинск область Чебаркуль олаште верланен. Спецоперацийыште 24 февраль годсек Шочмо элна верч шога.
Но жап шукат эртен огыл, Андрей 6 мартыштак сусырген, тӱрвыжӧ кӱрлын. Моско областьысе Подольскышто изиш эмлалтмеке, угыч бойышко наҥгаеныт. А варажым тений февральыште йолышкыжо осколко пурымылан кӧра Нижний Новгородыш эмлалташ колтеныт. Тунам реабилитаций жапыште Андрей шочмо кундемыштыже ик жап илен. Март гыч – адакат передовойышто.
Россий Президент В.Путинын 2022 ий 20 майыште лукмо Указше почеш Андрей Степанович Смирновым Суворовын медальже дене палемдыме. Тыгак спецоперацийыште ойыртемалтмыланак «За Отвагу» медальым пуэныт.
10 июльышто Марий Эл гыч колтымо гуманитарный грузлан путырак куанен да видеом сниматлен колтен. «Гуманитарный полыш толын шуын. Чыла арвер – шуруповёрт, газовый плитке, генератор-влак, киловатник, болгарке – верыштак. Мом йодынам, чыла колтеныт. Тынар колтат манын шым шоно да шым вучо. Чылаштлан кугу тау! Ялыште илыше-влакланат, Марий Эл Правительствыланат», – манеш землякна, «Виза» позывноян Россий салтак.
Эльвира Терентьева.