Марий Элыште «Лесная сказка» каныме рӱдерыште «Страна героев» сарзе да историй лагерь пашам ышта.
Тудо май мучаште шке омсажым элнан эн уста да чолга икшывыже-шамычлан почын. Лагерь икмыняр смене дене эрта, икымше смене 7 июньышто мучашлалтын. Тушко элнан тӱрлӧ регионжо гыч 400 наре тунемше ушнен. Нунын коклаште Йошкар-Оласе 19-ше номеран 7 «б» классын 13 тунемшыже лийын.
«Страна героев» – военно-патриотический шӱлышан лагерь. Тушко элнан историйжым шымлыше, коча-коваштын шуктымо подвигышт дене кугешныше ӱдыр-рвезе-влакым налыт. Нуно Российын историйже дене палдарыше курсышто, социальный проектированийыште, начальный военный подготовкышто, туризмыште, спорт таҥасымаште, тӱрлӧ лекцийыште шинчымашыштым шуареныт. Патриот-влакын кажне кечышт тӱвыргӧ да лектышан лийын. Кок арня жапыште нуно шук улан тунемыныт.