Водитель йолташем дене пырля икана йӱдым рейсыш пырля кудалаш логалын. Тудо автобус дене ола гыч яллашке пассажир-влакым шупшыкта. Маршрутын пытартыш остановкышкыжо миен шуде, ятыр еҥже волен кодын. Кугу автобусышто коктын веле лийынна. Кудалмына годым шоссе воктенысе корно тӱрыштӧ остановкым шекланенна. Туштыжо моткоч шуко еҥ шоген. Тидым ужын, водитель йолташем газ педальым чотрак веле тошкалын, пассажир-влакым кугу скорость дене кудал эртен. Тудын деч молан тыге ыштымым умылаш тыршенам. Варажым лучо йодманат огыл ыле манын шоналтенам.
Ты верыште ончыч чынжымак остановко лийын улмаш. КамАЗ-ым виктарыше водитель йӱшывуя тушко керылтын да остановкышто шогышо еҥ-влакым тошкен. Шкенжынат ӱмыржӧ тыгодым кӱрылтын. Тылеч вара автобус дене коштшо водитель йомын, а тудын виктарыме автобусшо остановко олмышто почмо омса дене шоген. Тушто нигӧат лийын огыл. Садлан водитель-влак шке коклаштышт ты верыште нигунам чарнен шогалаш огыл манын кутырен келшеныт. А мыланем тыгайым колышташ моткоч лӱдмашан ыле!
Виктор Т.
Килемар посёлко.