Когыльо пайрем

Сентябрьыште Шернур районышто Кукнур пайрем лийме нерген кӱчыкын возенна ыле. Ты гана тудо мероприятийын ик ужашыжым кумданрак почын пуэна.

Когыльо пайрем верысе тӱвыра пӧртыш Кукнур селасе да лишыл ялласе озавате-влакым чумырен ыле. Нуно тӱрлӧ сийым ямдылен миеныт. Икте тӱрлӧ подкогыльым темлен гын, весе – шыл когыльым. Пайрем тӱҥалме деч ончыч ӱстембалне мо гына уке ыле, лучко минут жапыште нимо ыш код. Мо нерген тиде ойла? Кочкыш чынжымак тутло лийын! Кажне озаватын – шке рецептше, шке секретше. А могай?

Людмила АЛГАЕВА, Эшполдино ял:

«Кукнур» когыльым лӱмын Кукнур селан тиде пайремжылан келыштарен ямдыленам. Такшым тудым сӧсна шыл да пареҥге дене ыштенам. Лач сынже ойыртемалтше, «Кукнур» манын возымо. Кӱтӱ черетем, сандене когыльым ятырак ямдылышым. Подкогыльо сынан когыльым ышташ йӧратем. Кӧргышкыжӧ тӱрлым пыштен кертам: шылым, пареҥгым, торыкым да молымат.

Галина ЯМБАРШЕВА, Корембал ял:

Шоган да шӱраш когыльым осыгечак ямдылаш тӱҥалынам. Шӱрашым ӱмбал дене нӧртен шынденам, руашым ямдыленам. Эрдене муным да шоганым ешарен пыштенам. Руашым тыге ямдылем: шӧрым да вӱдым иктӧр налам, рум, сакырложашым, шинчалым, ложашым иквереш пыштен лугем. Руашым нӧштылмеке, кӧргашым оптем да когыльым ыштем. Тыгай когыльым авамат, ковамат ыштеныт. Кочкаш ямдылаш йӧратем, кече коден, тӱрлӧ сий дене ешем сийлем. Шукын кочкышет тамле манын ойлат.