Сыр, мӱй да моло кочкыш сатум верысе фермер-влак «Гурманим в Марий Эл» фестивальыш аклаш луктыныт. Кочкыш фестиваль Юрино посёлкышто эртен. Чувашия да Татарстан республике, Угарман область гыч турист-влак деч посна Марий Эл Республикым вуйлатышын сомылжым жаплан шуктышо Юрий Зайцев продукцийыштым аклаш толын. Тудо кочкышым тамлен да икмыняр сатум налын каен.
«Республикнан ялозанлык предприятий-влакын сатуштын тӱрлӧ улмышт моткоч куандарыш. Ӱшанем, Российыште гына огыл, лишыл йот элыштат Марий Элысе фермер-влакын кочкышт сатушт ужалмаште пеҥгыде верым налыт», — шке шонымашыже дене пайлалтын Юрий Зайцев.