Ик вӱдылтыш печенье, ик ате сгущёнко, спагетти, ик пакет шӧр, кол консерве – тиде республикысе школлаште яра кочшо йоча-влаклан ик арняш кочкыш набор. Дистанционно тунеммашыш куснымылан кӧра «Сухой паёкым» шуко шочшан ешыште кушшо да начар тазалыкан йоча-влак кажне арнян налаш тӱҥалыт. Нине категорийлаш чылажге 17098 йоча пура.
Марий Эл Республикысе образований да науко министр Наталья Адамова тунемше-влаклан кочкыш наборым кузе погымо нерген ойлен:
– Тиде арнян набор-влакым кажне школлаш намиен шуктена. Пуэдаш палемдыме график-влак школласе сайтлаште уло. Пуэдыме жапыште санитарный противоэпидемический требований-влак шукталтыт. График почеш ача-ава-влак шукын лийшаш огытыл, нуно маскым чийышаш да коклаштышт дистанцийым кучышаш улыт. Йоча-влакын спискыштым идалык тӱҥалтышыште ыштыме. Шукерте огыл гына шуко шочшан еш але вес категорийыш логалше еҥ-влак, школыш миен, йодмашым возышаш улыт. Кугыжаныш ик кечыште ик йочалан 50 теҥгем ойыра. Муниципалитет-влак шукыж годым вич кечаш паёкым иканаште пуат. Ик наборын акше – 250 теҥге. Кажне муниципалитет наборым шке пога. Тушко заводской упаковкан шуко жап аралаш лийше кочкыш пура. Набор-влак кажне арнялан тӱрлӧ улыт. Сандене вес арнян вашталтыш лийын кертеш, мутлан, кол консерве олмеш – шыл консерве. Йошкар-Оласе йоча-влаклан кочкышым кок комбинат ямдыла. Сандене набор-влак икгай улыт. Икмыняр муниципалитет-влак сухпаёк-влакым 10 кечылан пуэдаш шонат. Тиде ситуацийым эскераш тӱҥалына.