Кугезе кочамын Кугу Ачамланде сарыште кредалмыж нерген йочасадыш коштмем годымак ачам каласкален. Ме еш дене Сеҥымаш Парадыште шуко гана лийынна, кочамын шӱгарышкыжат кажне ийын майыште коштына. Изирак лиймем годым шукыжым умылен омыл гын, кызыт чылажымат шӱм-чон вошт колтем.
Мый кудымшо классыш вонченам. Патриотизм шӱлышан ятыр мероприятийыште участвоватлем. Тыгодым кочамын чын салтак, Шочмо элже верч пеҥгыдын шогышо еҥ лиймыже, тушман ваштареш лӱддымын кредалмыже вигак ушышкем толеш.
Кугу Отечественный сар тӱҥалмеке, кугезе ковам ныл эргыжым: Максимым, Йогорым, Миклайым, Анатолийым – фронтыш ужатен. Максимын ӱмыржӧ 1942 ий февральыште Новгород областьысе Старая Русса ола воктене кӱрылтын. Тудым туштак тоеныт. Йогор Курск верч кредалме годым вуйжым пыштен. Миклай ден Анатолий сарым эртен, мӧҥгышкышт пӧртылыныт.
Кочам Николай Фёдорович Годунов Ленинградым фашист-влак деч утарымаште кредалын. Блокадын неле-йӧсыжым шке шинчаж дене ужын. Йошкар Армийыш тудым 1941 ийыште налыныт. 1942 ий 28 апрель гыч фронтышто кредалын. Ончыч мемнан кундемысе Сурок станцийысе 363-шо запасной полкыш логалын. Тушто салтак-влакым сӧйыштӧ кредалаш ямдыленыт. Тылзе наре туныктымеке, Ленинградский фронтыш колтеныт. Ты оласе пехотный училищыштат шинчымашыжым нӧлтен, но тӱрлӧ амаллан кӧра тунем пытарен огыл.
Младший сержант Николай Годунов 125-ше Краснознамённый стрелковый дивизийыште автоматчик-разведчик лийын. Тыгак 138-ше теҥыз истребительный бригадыште кредалын. Сӧй годым чолгалыкшым да лӱддымылыкшым ончыктен. Сусырген. Госпитальыште эмлалтмеке, уэш туллоҥгаш пурен. Тылеч вара адак нелын сусырген. Сеҥымаш кечым Ленинградыште вашлийын. Ты ола верч талын кредалмыжлан тудым III степенян Слава орден, «За оборону Ленинграда», «За прорыв блокады Ленинграда» медаль-влак дене палемденыт.
Шучко сар пытымеке, кочам Морко район шочмо Кесемлак селашкыже пӧртылын. Тысе калык дене пырля у илышым чоҥаш пижын. Ятыр жап колхозышто тыршен. Сулен налме канышыш лекмекыже, Морко ЛТЦ пелен электромонтёрлан коштын. Кеч-могай пашам кӱлынак ыштен. Иктаж-мом тӱҥалын гын, мучаш марте шуктен. Шымле ияш лиймыж годымат ялын старостыжлан шоген. Тудо калыкым тӱрлӧ пашалан кумылаҥден кертын. Йырым-йырысе кумдыкым тӱзатыме, арулыкым эскерыме шотышто пеҥгыдын йодын. Ӱмыржӧ кӱчык лийын гынат, калык коклаште тудын нерген сай шарнымаш гына ила. А мемнан шӱмыштына тудо лӱддымӧ марий патыр, герой!
Мый кочам дене моткоч кугешнем. Тудын патриот койышыжо мыланем эре пример лиеш.
М.Годунов Медведево посёлкысо 3-шо номеран школ.