10 февральыште Кужэҥер район Старселаште Коҥга пазар пайремым тений кумдан палемденыт.
Кужэҥер районысо каныме да тӱвыра рӱдерын методический пӧлкажым вуйлатыше О.А.Сергееван мутшо почеш, тушко чылаже 12 усталык коллектив толын.
Пайрем тӱҥалтыште Старсела тӱвыра пӧрт ончылно уремыште ярмиҥга эртаралтын. Ужалышыже ужалкален, налшыже налын, ончен шогышыжо шагал лийын. Команде-влак телымсе тӱрлӧ модыш дене модыныт.
Тысе тӱвыра пӧртын «Тымык кас» мурышо да куштышо ансамбльже уна-влакым муро да кинде дене вашлийын. Пайремым Кужэҥер районысо тӱвыра пӧлкам вуйлатышын алмаштышыже Наталья Валерьевна Анисимова почын.
Йывансола гыч «Ал маска» йоча фольклор коллектив калык модмашым устан да оҥайын модын ончыктен. Морко район Изнур ялысе «Ӱшӱт сем» фольклор ансамбль «Когыльо чес» пайрем дене палдарен. Советский район Кукмарий гыч «Весела кумыл» ансамбль сценыште Коҥга пайрем йӱлам модын ончыктен. Кужэҥер районысо шуко коллектив у творческий программе дене куандарен, модыш сынан муро-куштымашым, конкурсым эртарен.
Тӱвыра пӧрт фойеште чумырымо «Тутло сий» марий кочкыш выставке- конкурсыш 16 участник ушнен. Кажныже шӱрашан мелна кышылым, салмамуным, туарам ямдылен. Нунын пашаштым посна жюри огыл, а ончаш толшо калык аклен: тӱжвал тӱсшым, тамжым. Тыге сеҥышыш Морко районын участникше лектын. Чыланат диплом да пӧлек дене палемдалтыныт.
Коҥга пазар годым мастер-класс-влакат лийыныт. Иктышт ротанг гыч корзиҥгам пидыныт, весышт йоча-шамычлан когыльым тӱрлаш туныктеныт, кумшышт модыш курчак-влакым ыштыл онченыт але марий тӱрым шымленыт.
Старсела кундемын шочшыжо Надежда Рыбакова калыклан шке возымо «Мо тугай марий ватын коҥгаже?» почеламутым лудын пуэн. Пайрем годымак Коҥга пазар вашеш эртаралтше районысо фотосӱрет да еш сӱрет конкурслам иктешлыме, сеҥыше-влаклан пӧлекым кучыктымо. Тушко 123 участник ушнен.
Варажым еҥ-влак Старсела деч кум меҥге тораште верланыше Лопсолашке кудалыныт. Уна-влакым Егошинмыт еш вашлийын. Тушко кажне фольклор коллективын вуйлатышышт, тыгак Токтайбеляк села гыч «Ший аршаш» ансамбльын участникше-влак да гармоньчо миеныт. Озавате толмашешышт коҥгаш олтен, мелна руашым луген, ӱстелым поген ямдылен. Еҥ-влак, мелнам шкештак кӱэштын, тамлен онченыт, оза-шамычым уна муро дене куандареныт, пайрем шӱлышым пуртеныт. Тыге участник-влак ыреныт, а коҥга кӱлешан улмыжым эше ик гана пеҥгыдемден.
Эльвира Терентьева.
Фотом Кужэҥер районысо каныме да тӱвыра рӱдерын методический пӧлкаж деч налме.