Икте-весылан эҥертен, полышым пуэн веле неле-йӧсым сеҥаш, тушманым чактараш лиеш. Тӱшкаште – вий, маныт. Украиныште СВО-што улшо марий рвезе-влак ынышт кылме манын, Пошкырт кудемыште коҥгам ыштен колтат. Ты суапле пашам Пошкырт кундем Мишкан район Кугу Соказа ялын шочшыжо, Бирск (Пӱрӧ) ола гыч чолга еҥ, «Аргон» предприятийым кучышо В.А.Сабиров шукта.
В.Сабиров 1994 ий годсек шке шонен лукмо тӱрлӧ коҥгам ышта. Пашам вораҥдарен колташ тудлан «Аргон» предприятийже полша. Тудым 2007 ийыште Пӱрӧ олаште почмо. Тушто кӱртньӧ конструкцийым ямдылат, кӱртньым таптат, шуко тӱрлӧ коҥгам ыштат. СВО тӱҥалмеке, Вячеслав Сабиров боец-влаклан келшыше коҥгам лукташ тӱҥалын.
– Нунылан йӧршӧ коҥгам шукертак шонен луктынам. 2020 ийыште тидлан патентым налынам. Тиде коҥга ойыртемалтше, пеш кӱлешан. Тудо ик минутышто монча коҥгашке савырнен кертеш. Тушто боец-влак кочкаш шолтен, ырыктыме вӱд дене мушкылтын да ырен кертыт. Украинышке СВО-што улшо марий рвезе-влаклан ӱмаште 106, тений 70 блиндаж да монча коҥга-влакым колтенам. Марий йӱла почеш Юмым сӧрвален волгалтаренна. Тидыже аралтыш гай лиеш.
Тидлан рвезе-влак пеш куаненыт. Июльышто СВО гыч канышлан толшо ик боец мый декем пурен лекте. Тудым марий рвезе-влак таушташ йодыныт. Мыйын ыштыме коҥгам блиндажыште йӱштӧ телымат илен лекташ чот полшен улмаш. Тыгодым иктат кылмен да черланен огыл. Боец мыланем пӧлекым кучыктыш.
Кылмет гын, вашке черланаш лиеш. Тунам могай боец лият? Сандене йодмышт почеш нунылан умбакыжат полшаш тӱҥалам, – мане Вячеслав Александрович.
В.Сабиров – марий калык верч шогышо, шочмо йӱлам аклыше, пагалыше чолга еҥ. Тудо Пӱрӧ районысо марий тӱвыра автономий вуйлатышын алмаштышыже, тыгак Мишкан районын депутатше. Шочмо вершӧржӧ тӱзланыже манын, шуко пашам ышта. Тений шыжым Йошкар-Олаште эртаралтше Марий Мер Каҥашын шыжымсе форумышкыжат толын ыле. СВО-што улшо марий боец-влаклан полшен шогымыж нерген шуко каласкалыш.
В.Сабиров тӱҥалме пашажым умбаке шуя, марий салтак-влак таза гына лийышт манын шона. Поро пашажым боец-влак аклат, тудым пагалат. Тидыже нунын верч тыршаш ончыкылан куатым ешара.
