Маргариткым ожнысек тӱрлӧ черым эмлаш кучылтыт, чыла ужашыжым кочкаш лиеш. Лышташым салатыш, пеледышым чайыш ешараш сай, тудо организмыште вешества-влак алмашталтмым саемда.
Маргаритке настойко пуалмым кораҥда. Тудым компресслан да ваннылан кучылтыт. Кок кугу совла шудо (лышташ, вондо, пеледыш) ӱмбак пӧлемысе температуран ик стакан вӱдым темыза, 4-6 шагат шинчыктыза да шӱрыза. Лемым пуалше коваште черым эмлаш кучылташ лиеш. Арам огыл маргаритке «эре мотор» манын кусаралтеш.
Маргаритке тыгак аппетитым, пагарын пашажым саемдаш, шекшым лукташ, мокш черым эмлаш да вӱрым эрыкташ кучылталтеш. Тыгак кокыртыш годым пайдале.
Чайлан кок изи совла маргаритке пеледыш да лышташ ӱмбак 250 мл шокшо вӱдым темыза, 10 минут шинчыктыза да шӱрыза. Кечеш кок гана ик чашке дене йӱза. Ты чайым парем кертдыме сусырыш компресс семын кучылтыт але дерматит годым примочкым ыштат.
Ик изи совла маргаритке ден ик изи совла кишкышинча (фиалка трехцветная) ӱмбак пӧлемысе температуран ик литр вӱдым темыза, 8-10 шагат (йӱдвошт) шинчыктыза да шӱрыза. Лемым мокш чер годым йӱза.