Морко район Шÿргыялыште шочын-кушшо Клавдия Эманова кызыт ешыж дене Йошкар-Олаште ила да ик эмлымверыште медшÿжарлан пашам ышта. Тыгай сылне да кызытсе жапыште шуэн вашлиялтше лÿмым тудлан ачаже Вячеслав Изосимович Игнатьев пуэн.
«Лишыл еҥем, родо-тукымем мыйым Клава маныт. Ачам ковам Клавдия Алексеевна лÿмеш тыгай лÿмым пуэн. Тудым мый ужын шуктен омыл. Ваваем Кугу Отечественный сар годым тылыште тыршен, тракторым виктарен. Шыма да поро лийын. Тÿжвал сынже дене ачамын родыже-влак ковам гай коям маныт», — ойла К.Эманова.
Клавдия лÿм латин йылме гыч «окшак» манмым ончыкта. Но ожно тыгай лÿмым улан ешыште шочын-кушшо ÿдыр ден эргылан веле пуэныт. Кызыт Клавдия лÿм виян да поян манмым ончыкта.