Марий Эл гыч делегаций Китайыште «Волга-Янцзы» Х Российысе-Китайысе молодёжный форумышто лийын.
Тушко кок эл гыч 300 наре студент ушнен, нуно шке опытышт да шинчымашышт дене ваш палдареныт, йӱлашт нерген каласкаленыт.
Марий Эл гыч Волгатехын да МарГУ-н 10 еҥже миен. Икымше кечынак нуно Аньхой провинцийысе самырык еҥ-влак дене вашлиймашым эртареныт: палыме лийыныт, рушла да китайла икмыняр мутым тунемыныт, шке нерген каласкаленыт, муро-влакымат муреныт. Кастене Чунцин олаште тӱнямбал циркыште шоум онченыт.
Эрлашыжым республикнан делегацийже Чунцин олан ойыртемалтше да оҥай верлажым ончен коштын. Российысе да Китайысе самырык тукымым шуарыме да туныктымо темылан «йыргешке ӱстел» лийын. А вара тӱвыра фестиваль эртаралтын: Марий Элын делегацийже марий куштымаш дене чылаштым ӧрыктарен, марий калык аралтыш-влакым ямдылаш туныктен, палдара Йошкар-Олан администрацийже.
Фото: Республикнан делегацийже Китайыште марий койышым ончыктен.
Марий Элысе Образований да науко министерствын ВК-се тӱшкаж гыч налме фото.