Китай, Италия, Люстра…

 

Загс пашаеҥ-влак лӱмым пуымо шотышто эре гаяк иктешлымашым ыштат. Марий Турек районысо загс пӧлкам вуйлатыше Г.В.Орлова оҥай лӱм шотышто ятыр документым пургедын.

2020 ийыште ойыртемалтше лӱм нерген ойлаш гын, Марий Турек кундемыште Ильзида, Джамигуль, Залина, Лайло ӱдыр-влак да Данияр, Зейнаб, Ясмин эрге-влак шочыныт.

«Чынжымак, оҥай да ойыртемалтше лӱм-влакым пуышо-влак эре лийыныт да улыт. Ожнысым шергал шинчымеке рашемденам: кундемыштына теве 1926 ийыште, партийный пашаеҥын ешыштыже эрге шочмеке, он Владимир Ильич Ленинын икымше буквалаж дене Вил лӱмым пуэныт, варажым ты лӱм гычак Вилария ден Вилория лектыныт. Кугу Отечественный сар годым кугезе тукымнан кышаже сайынак палдырнен – шочшо азам Элевий, Уналче, Уначи, Сасканай, Ларион, Ваньга, Саньга, Пайгельде, Викентий манын лӱмденыт. Сар годым Гитлер ваштареш кредалынна гынат, еш-влак йочаштым Адольф манын лӱмдаш ӧрын огытыл», – каласыш Галина Васильевна.

Сар деч вара Марий Турек районышто Аргентин лӱм вашлиялтеш. Тыгак тунамсе шкешотан лӱм-влакымат палемдаш лиеш: Феликс, Элина, Шахзода, Юлиана, Луиза, Нелли, Рамзиль, Лада, Ростислав, Марк, Бронислав, Эраст, Райназ, Ильвина, Линда, Мирослава, Расул, Елисей, Анэлия, Ирик. Тылеч посна Арбор ялсоветыште Китай лӱман марий ӱдырамаш илен (1938 ийыште колен). Вочарма ялсоветыште 1932 ийыште шочшо Италия лӱмым возымо факт уло. Тыгай лӱманже мыняр лийыныт – раш огыл. Возымылаште кум фамилиян Италия ӱдырамаш вашлиялтеш. Тылеч посна 1932 ийыште Пиштанке ялсоветыште ӱдырлан Люстра лӱмым пуэныт.