Марий Элым Вуйлатыше Ю.Зайцев Федеральный Собранийын делегацийже дене пырля Китайыш миен коштын.
Тудо Шэньян олаште эртыше семинарыште лийын. Тушто Марий Элын гуманитарный сферыште да экономикыште улшо потенциалже дене палдарен. Образований, тӱвыра, туризм да промышленность направленийла почеш икте-весе дене пашам ыштыме нерген каҥашыме.
Ю.Зайцев Марий Элын Китайысе Ляонин провинций дене кылым вияҥдаш кумылан улмыж нерген ойлен.
Тыгак Йошкар-Оласе ПГТУ ден МарГУ дене палымым ыштен. Ты кок вузышто кӱшыл квалификациян кадрым ямдылат, вуз-влак Российысе Юл кундем федеральный округысо, тыгак Китай Калык Республикысе Янцзы эҥер воктенысе куд провинцийын вуз-влак ассоциацийышкышт пурат. Республикысе студент-влак Российско-китайский молодёжный форумышко дистанционно чӱчкыдын ушнат.
– Тендан провинций гыч ӱдыр-рвезе-влак Марий Элысе вузлашке физике, математике, химий, биологий да тыгак микроэлектронике специальностьла дене тунемаш пурен кертыт. Шанче аланыштат шинчымашым пырля налаш лиеш. Икте-весе дене кылым ыштен, специалист, туныктышо, учёный-влакым вашталтен кертына. Ты направленийым вияҥден колташ манын, тендан деке вузла гыч ректор-влакым колташ але мемнан деке специалист-влакым ӱжаш ямде улына, – манын Ю.Зайцев.
Тудо туризм шотышто кылым вияҥдаш кӱлмӧ нерген ойлен.
Ляонин провинцийысе Калык представитель-влак собранийын Постоянный Комитетшын Председательжын алмаштышыже Гун Фуцин тунемме заведений да научно-технический лабораторий-влак дене палдарен. Провинцийыште научно да технический шинчымаш виян манын. Чылаже тушто 114 кӱшыл тунемме заведений, 1613 шанче да образований институтлаште 5 тӱжем утла академик, 14 кугыжаныш лабораторий да 12 национальный шымлыме рӱдер улыт. Гун Фуцин Марий Эл дене образований шотышто кылым вияҥдаш ямде улмыжым каласен.
***
Марий Элым Вуйлатыше Ю.Зайцев ден Федераций Совет Председательын алмаштышыже К.Косачев Шанхай оласе деловой сообществын представительже-влак дене мутланеныт.
Вашлиймашыште кадрым ямдылыме, республикыш кӱкшӧ технологиян оборудованийым кондымо, производствышто у технологийым кучылтмо да моло нерген каҥашеныт. Микроэлектроникылан, тыгак инвестиционный проект-влакым пырля илыш шыҥдарымылан посна тӱткышым ойырымо.
Ю.Зайцевын палемдымыж почеш, Китайысе партнёр-влак дене пырля пашам ыштымылан кӧра производствым вияҥдаш да сатум шукырак ужалаш йӧн лиеш. Тудын мутшо почеш, Марий Элыште микроэлектронике – ӱшаным пуышо направлений. Марий Элыште полупроводниковый прибор-влакым, неле микросхемым ыштен лукшо виян производственный базе уло. Но тыгодым печатный плато кӱлеш.
Китайысе представитель-влак торгово-экономический кылым ышташ да технологий ден разработкым икте-весылан палдараш ямде улмыштым ойленыт.
Тыгак тиде отрасльыште тыршыше кӱкшӧ квалификациян кадрым ямдылыме нерген кутырымо. Сенатор Китай гыч туныктышо ден студент-влакым Марий Элыш колташ, кундемна гыч самырык ӱдыр-рвезе-влакым Шанхайышке тунемаш колташ темлен.
Марий Элым Вуйлатышын администрацийжын информаций паша пӧлкажын уверже-влак негызеш ямдылыме