Марий Элым Вуйлатыше Юрий Зайцев Федеральный Собранийын делегацийже дене пырля Пекиныш каен.
Тушто делегат-шамыч Китай Калык Республикысе Калык представитель-влакын Всекитайский собранийжын Постоянный комитетшын Председательже Чжао Лэцзи дене вашлийыныт.
Делегацийым Российысе парламентын кӱшыл палатыжын Председательже Валентина Матвиенко вуйлатен. Тудо ӱжмашлан тауштен да паша план нерген ойлен, Россий да Китай коклаште шукертсек пеҥгыде кыл улмо нерген ушештарен.
Чжао Лэцзи кок эл коклаште политический, экономический кыл келгемме, кумдаҥме, тӱнямбал ареныштат кыл пеҥгыдемме нерген каласен. Федераций Советын спикерже ик эн тӱҥлан Российысе регион-влак ден Китайысе провинций-влак коклаште пашам пырля ворандарен колташ кӱлмым палемден.
Федераций Совет Председательын алмаштышыже Константин Косачевын мутшо почеш, делегаций дене пырля Российын кум субъектше гыч представитель-влак каеныт. Нунын коклаште Марий Эл Республике лийын.
Юрий Зайцевын палемдымыж почеш, Марий Эл ден Китайын икмыняр провинцийже коклаште торгово-экономический, научно-технический да гуманитарный сферылаште сай кылым ыштыме. КНР – кундемнан сай партнёржо. Республик вес провинций-влак денат кылым вияҥдаш шона.