Морко район Унчо школышто 7-ше классыште тунемше-влак Ӱярнялан чот ямдылалтыныт.
Йоча Ӱярня пайрем тений онлайн йӧн дене эртаралтын. Унчо ӱдыр-рвезе-влак конкурсын ныл номинацийже денат видеом ямдыленыт. Нунын выступленийыштым кодшо рушарнян кече мучко войзеныт. Тидлан класс вуйлатышышт Р.Н.Петрова сценарийым келыштарен, а йоча-влак ик тылзе репетицийыш коштыныт, курыкышто шӱшканъче, йолъече дене да ӱярнявараште мунчалташат тунемыныт.
Эн ончычак «Ӱярня мелна» пайрем тӱвыра пӧртыштӧ эртаралтын. Ӱдыр-влак вынер тувырым чиеныт, ончылсакышым ӱшталыныт, пумага шовычым тореш пидыныт, ӱпышкышт йошкар тасмам пижыктеныт. Ты кундемыште Ӱярнялан шым тӱрлӧ мелнам кызытат кӱэштыт. Лач тидын нерген ӱдыр-шамыч каласкаленыт. Унчо велне команмелнамат тиде пайремлан гына кочкыныт. Вес ойыртемже – киш мелна. Моло вере тудым тувыртыш маныт. Тыгай мелнам Олеся Михайлован аваже кӱэштын – ты кечылан лачак ушкалже презым ыштен. Участнице-влак киш мелна дене кылдалтше ойӧрӧ-влакым каласкаленыт, мелнам салмаш пыштен, салмавондым кучен, куржын ӱчашеныт.
Вара чыланат Янык памаш воктенысе курыкыш каеныт. Тушко ӱдыр, вате да ковай-влак шем мыжерым чиен, пеледышан, йолван йошкар шовычым пидын толыныт. А йолыштышт – йыдал, шем ыштыр дене пӱтырымӧ. Рвезе-влак фуфайкым, портышкемым чиеныт, йошкар ӱштым да потам ӱшталыныт, теркупшым упшалыныт. Самырык тукымлан вургемым чикташ тӱвыра пашаеҥ-влакат полшеныт. Чылан пырля нӧрен пытымешке мунчалтеныт, модыныт. Ӱдырамаш-влак мурымат муралтен колтеныт.
А.Ивановын фотожо.
Умбакыже — 4 мартыште лекше «Кугарня» газетыште.