Шке кид дене ыштыме ӱзгар куаным веле огыл конда, тыгак оксам ыштен налаш полша. Теве Инга Авраменко киш дене тӱрлӧ сӧрастарышым ышта да ужала.
Икымше ошкыл
Инга Йошкар-Олаште шочын-кушкын. Школышто тунеммыж годым ӱдырлан географий предмет келшен, сандене шкаланже пӱртӱс дене пайдаланыше профессийым ойырен налын. Вара ПГТУ-што экологий да пӱртӱс дене пайдаланыме специальность дене шинчымашым поген.
– Тунеммем годым ты профессий мыланем келшымым чарнен, сандене шке специальность дене пашам ыштен омыл. Шкемым тӱрлӧ аланыште терген онченам. Телефонлан аксессуарым ужалыме кевытыште пашам ыштымем годым ювелир киш дене тӱрлӧ сӧрастарышым ышташ лийме нерген пален налынам. Мыланем ты сомыл келшен. 2021 ийыште киш дене сӧрастарышым ышташ тӱҥалынам, – ойла Инга.
Тыгай сомыллан кидмастар шке гыч тунемын, интернетыште тӱрлӧ ой-каҥашым лудын да видеом ончен.
– Мыйын вич тӱжем теҥге погымо оксам лийын, туддене формычкым, наполнительым да кишым налынам. Ик банке киш гыч кум декоративный подстаканникым ыштенам. Кум подстаканник гыч иктыжым гына кугу скидке дене ужален кертынам. Нуно шагал пашадарым конденыт, сандене сӧрастарыше ӱзгарым ышташ тӱҥалынам. Тыге ик тылзе гыч вич тӱжем теҥге оксам сулалтын, эше кок-кум тӱжем теҥге ешаралтын.
Еҥ-влак алгам, шӱйышкӧ сакышым, брелокым йӧратен налыт. Рвезе-пӧръеҥ-шамычат йодыт, утларакше – мужыран кулоным але брелокым. Сӧрастарыше ӱзгар моторрак лийже манын, кеҥежым тӱрлӧ пеледышым лӱмын поген коштем, вара тудым кишыш ешарем.
Тӱҥалтыште тиде чонлан келшыше сомыл гына лийын, а вара тӱҥ пашашке савырнен. Сандене кевыт гыч каенам да уло жапемым сӧрастарыше ӱзгарлан пӧлеклем, – палемда кидмастар.
Эре сай тылзе огеш лий
– Пашаштем тӱрлӧ кишым кучылтам, уда качестван киш оралген кертеш, сандене, налмеке, нуным эре тергем. Кызыт кок тӱрлым гына налам: кок компонентаным да ультрафиолетаным. Кок компонентан киш шулдырак, но ик-кум кече кошкен кертеш. Ультрафиолетан киш шергырак, но лампе йымалне вич минутышто кошка. Киш пеш вашке нугыдемеш, сандене пашам писын ыштыман. Мый сӧрастарыш ӱзгарым кугу партий дене ышташ йӧратем, тыге тӱрлӧ ӱзгар лектеш да киш арам огеш локтылалт.
Эскиз-влакым шке шонем, сандене кажне сӧрастарыше ӱзгар шкешотан, ойыртемалтше. Чонемлан сайын чучеш, кунам уремыште ӱдырамаш-влакын ӱмбалнышт шке алгамым, сакышым ужам, – каласкала И.Авраменко.
Но сӧрастарыш-влакым эре ужален кертын огыл. Сандене Инга ик жаплан угыч кевытышке пӧртылын.
– Февральыште, октябрьыште да ноябрьыште пайрем-влак пытымылан кӧра ӱзгар-влакым шагал наледат, туге гынат ужалымым ом чарне. Ик интернет-кевытын пашаеҥже-влак мый декем лектыныт да 50 сӧрастарыше ӱзгарым ужалаш йодыныт. Мый келшенам да кажне алгам, сакышым посна мотор коробкаш пыштен пуэнам. Тунам мый 18 тӱжемым ыштен налынам, – ойла кидмастар.
И.Авраменкон эн шулдо ӱзгарже 300 теҥгем шога, эн шергыже – 1000 теҥгем. Кидпашалан ӱдырым лишыл еҥже, родыжо-шамыч кумылаҥдат. Нуно Ингам эре моктат, у сӧрастарыше ӱзгарым «шочыкташ» полшаш интернет гыч тӱрлӧ видеом колтат.
Мастер-классым эртара
Йошкар-Олаште изирак предприниматель-влаклан ужалаш тӱрлӧ йӧным ыштыме. Тыге сатулымо рӱдерыште ярмиҥгам эртарат, кажне шуматкечын Чавайн бульварыште шке ӱзгарым ужалаш пӱкен ден ӱстембалым шындат. Ингат тушко ушна. Кеҥежым тыгак Татарстан кундемыш Алабога олаш ярмиҥгаш каяш шона.
– Ярмиҥгаште моло кидмастар-влакын мастер-классым эртарымышт нерген пален налынам да шкежат ты сомыллан кумылаҥынам. Тыгак кресавам, тудын ӱдыржӧ сӧрастарыш-влакым ышташ туныкташ йодыныт. Мутланен, туныктен моштымемым шижынам, сандене мастер-классым арендыш налме студийыште эртараш тӱҥалынам. Тушко лу еҥ марте ушнен кертеш. Кумылан-влак мый декем интернет гоч возалтыт, вара ассортимент дене палыме лийыт да пашам ыштыме годым дизайным шонен луктыт. Тидлан 1-1,5 шагат жап кая. Шке ыштыме ӱзгарыштым нуно мыланем кодат, нуным тӧрлем, коштем. Ик-кок кече гыч ямде ӱзгарым толын налыт, – ойла ӱдыр.
Инга шке студийым почаш, киш дене пашам ыштыме курсым тӱҥалаш кумылаҥын. Тидлан «Мой бизнес» полшымо дене социальный контрактым налнеже. Кидмастар тыгак киш гыч ӱстембалым, шагатым да тулеч моло интерьер ӱзгарым ышташ да ужалаш шонымаш дене ылыжын. Ӱшанена, Инга шонымашышкыже шуэш.