29 январьыште Киров область Вӱрзым район Кугу Рой селасе тӱвыра пӧртыштӧ Марий касым эртареныт.
Пайремыш шке районысо да пошкудо Малмыж районысо ял ден селала гычат уна-влак толыныт. Нуным тӱвыра пӧрт пеленысе «Ош пеледыш» самодеятельный коллектив марий муро дене вашлийын. Толшо-влак марий тушто-влаклан вашмутым кычалыныт, модыныт, марий йылмым сайын палымыштым конкурслаште тергеныт.
Пайрем годым Тӱм-Тӱм ял гыч Р.Еноктаева ден Шурма села гыч М.Сергеева марий такмак-влакым йоҥгалтареныт. Тоймучаш ял гыч Н.Бушкова самырык годсо мурым муралтен. Поповка ялыште илыше Т.Еноктаева толшо-шамычым весела такмак-влак дене куандарен. Малмыж район Кӱанэҥер ялын «Кӱанэҥер» коллективше мурымаш да куштымаш дене кумылым нӧлтен.
И.Устинова, А.Бушкова.
