Кинза бактерийым пытара, садлан тудым кылмен черланыме тургымышто утларак кочкаш темлат.
А лышташ гыч налме сокым стоматологийыште кучылтыт, тудо пӱйшылым пеҥгыдемда, пӱй корштымым чара.
Кинзан нӧшмыжӧ, тудым кориандр маныт, нервым лыпландара, нойымым кораҥда. Тыгай настойым мален кертдыме да хронический нойымо годым йӱыт.
Но кинзам утыждене кочман огыл, мӧҥгешла, вуйлан неле лийын кертеш, мален колташ неле. Иканаште 35 грамм деч утла кочман огыл.
Кинза нӧшман лем кочкышым шулыктарыме корно черым, изи сусырым, удыралтме палым эмла, а лышташ – аяргымым.
Кушкыл А, В, С тӱшкаш пурышо витамин-влаклан поян. Нӧшмым йӱлалтыме шикш вуй корштымым чара, насморк годым пайдале, пӧлемым дезинфицироватла. Но аллергий дене орланыше-влаклан тыге ышташ ок лий.
Тыгыдемдыме лышташ дене ыштыме компресс температурым волта, коваште черым эмла. Компрессым сусырыш пыштыман. Пагар спазм годым икмыняр кинза лышташым пурман.