13 май – Россий МВД-н охранно-конвойный службыжын кечыже.
Кажне еҥ пий дене пашам ыштен кертеш мо? Кинолог могай лийшаш? Нине да моло йодышлан вашмутым А.Васильев дене кутырымеке пален налына.
Тудо Россий МВД-н Морко районысо осал-пашам ыштыше-влакым жаплан кучымо изоляторышто (ИВС-ыште) полицейский-кинологлан пашам ышта, полиций сержант.
Морко район Кожлаерын шочшыжо изиж годым военный лияш шонен. Садлан школышто физкультур урокыш куанен коштын. 9-ше класс деч вара Марий радиомеханический техникумыш тунемаш пурен, автоэлектрик да механик специальностьлам налын. Техникум деч вара армийыш каен, 779-ше №-ан ракетный полкышто разведчик-пулемётчик лийын.
– Армий нерген сайым гына каласен кертам. Чын пӧръеҥ лияш армийыш миен толманак, шонем. Капкыл денат, койыш-шоктыш денат пеҥгыдырак лийынам, тӱняумылымашемат вашталтын, илышымат вес семын ончаш тунемынам, – манеш А.Васильев.
Армий деч вара рвезе шке районысо полиций пӧлкаш пашаш пурен. 2020 ий годсек ИВС-ыште полицейский-кинолог. А.Васильевын кызытсе пийже – Магнат лӱман кок ияш немыч овчарке. Пий дене палыме лияш, тудым сайын умылаш пел ий наре жап кӱлын. Магнат шке коллегыжым ик гана пурлынат шуктен.
– Магнат пеш тыматле, командым колыштшо. Но палыдыме еҥ деке шыде кумылан. Дрессировко арнялан кок-кум гана лиеш. Тушто Магнат команде-влаклан пеш вашке тунемеш, – ойла А.Васильев. – Кинологын службыжым тыглай профессийлан ом шотло, тиде призваний манын кертам. Ты профессийыште пийым йӧратыман веле огыл, тыгак шке пашалан моткоч шуко жапым ойырыман. Полицейский-кинолог пеҥгыде да чытыше, лӱддымӧ лийшаш, чыла ужын-шижын шуктышаш, неле ситуаций гыч пеш вашке лектын моштышаш. Сай кинолог пырля служитлыше пийжым пеш писын шижын, тудын ончыкыжым мом ыштымыжым пален моштышаш. Тыге гына сай паша лектыш шуаш лиеш.
Андрей Васильевымат лач тыгайлан шотлыман. Паша опытшо кугу огыл гынат, тудо шукылан тунем шуын да кызытат тунемеш. Рвезе Россий МВД-н Уфа оласе специалист-кинолог-влакым ямдылыме школыштыжо курсым эртен.
Пырля служитлыше пийым кинолог шке ок ойыро, тудлан лӱмын туныктымо пийым пуат. А.Васильевын икымше пийже Дарида лийын. Службо мучашлалтмеке, тудым рвезе мӧҥгыжӧ конден. Но чаманен каласыман, икмыняр жап гыч Дарида черланен колен. Магнат моло служебный пий семынак осал пашам ыштыше-влакым ИВС гыч следственный изоляторыш, медучрежденийыш, следственный действийым эртарыме верлаш кондыштарыме годым полша.
А.Васильевым да коллегыже-влакым Конвоир-влакын кечышт дене саламлена. Куштылго огыл да кӱлешан, тыгодымак романтик сынан профессийыштышт сай паша лектышым тыланена.
А.Васильевын альбомжо гыч налме фото.