Кызыт еҥ-влакым мер пашалан кумылаҥдаш йӧсырак гынат, Морко район Кинер кундемысе калыкын келшен илымыже шинчалан вигак перна. Ала чыла тидыже вуйлатыше (Морко ола шотан илем администрацийым В.А.Борисов вуйлата) деч шога…
Теве икмыняр ий ончычынак Кораксола ял покшеч йоген эртыше памаш воктене пу пӧрт сынан мотор оралте чоҥалте. Кодшо кеҥежым тудын йыр у савар нӧлтӧ. Тыгак Кораксола ялыш пурымаште часамлам чоҥаш тӱҥалме. Кажне шӱгарла йыр профнастил гыч у печым ыштыме. Тидыже пешак чот кумылым нӧлта. А вет ты мер пашашке южо еҥже чонжо ӱжмӧ почешак шке надыржым пышта, а ала-кӧжӧ ӧрдыж гыч онча да ушнаш огешат шоно, шийвундо надыржымат ок пу.
Шочмо элым аралыше-влакын кечышт вашеш Кораксола ялысе пӧръеҥ-влак (кӧ Афган але Чечня сар гоч эртен) ял покшелне верланыше Кугу Ачамланде сарыште мемнан эрыкна верч шке вуйыштым пыштыше салтак-влакын обелискышт ончыко пеледыш аршашым пыштышт. Тыге самырык тукымлан пример ончыкталтеш.
Шукерте огыл Кораксола тӱвыра пӧрт Кораксола ял калык дене пырля Ӱярня пайремым сайын эртарен колтыш. Тыште адакат тӱвыра пӧртна пеленысе «Муро кумыл» фольклор ансамбль чолгалыкшым ончыктыш. А Ярансола ялын чолга гармоньчыжо Вениамин Борисовлан пайремнам сӧрастарен колтымыжлан поснак кугу таум каласыме шуэш. А 26 февральыште Кораксола тӱвыра пӧрт Марий касышке калыкым лыҥак чумырыш.
Тыге Кинер кундемыште ен-влак ваш келшен илат, пайремымат пырля эртарен моштат, самырык тукымланат примерым ончыктат.
Елена Григорьева, Кораксола тӱвыра пӧрт вуйлатыше.
Снимкыште: Кинер кундемысе калыкын рӱж эртарен колтымо пайремже годым.