Коча-кована-влак таче кечынат эртыше сарын кочо тамжым монден огытыл, а у жап шке «пӧлекшым» самырык тукымлан ямдылен шогеныт улмаш. Тачысе илышын пуламырже чумыр калыкын чытышыжым терга. Но садыгак калык вуйым огеш саке да сеҥымашлан ӱшанен ила.
Теве Кинер кундемысе калык мобилизоватлыме салтак-влаклан шке полыш кидшым шуялтенак шога. Илалшыже носким, пижергым пидеш да сарыш колта. Вет южо суртышто тулат уке, а пидме носким икмыняр мужыр денак пуат. Тидыже нелын илыше еҥын ойгым умылен моштымыжым да полшаш ямде улмыжым раш ончыкта. А самырык тукымжо волонтёр радамышке ушна. Ялысе калыкын погымо гуманитар полышыжым иктыш чумыраш да сарыш колташ полша.
Школыштат, самырык тукым илышын вашталт да нелем толмыжым ужын да умылен моштыжо манын, кугу паша ышталтеш. Теве марий сылнымут уроклаште але марте Н.Лекайнын «Шӧртньӧ падыраш» повестьшым лудмо годым самырык тукым вел гыч тыгай тӱткылык шижалтын огыл. А кызыт лудына – йоча-влакын чурийыштат вашталтын кая. Нуно ятыр йодышым пуэдат. Маныт: «Произведенийыште ковай-влак носким. пижергым пидыт. Йоча-влакат фронтлан чот полшат. Ӱдыр-шамыч презым ончат, а рвезе-влак имньым ӱчашен-ӱчашен куштат. Чыла тидыже фронтыш чынак миен шуын мо?» Але теве В.Ивановын «Вӱдшӧ келге, серже тура» повестьыште эвакуироватлыме еҥ-влакым ялыш кондат да ялысе правленийыште погынымаш годым кажне суртыш икмыняр еҥ дене илаш пуртат. Эстон рвезе Эйно тунемшына-влаклан поснак чот келша. Тидым лудмо годымат йоча-влак адак тӱрлӧ йодышым пуэдат, да полышым пуаш ямде улмышт чоныш логалеш.
Чынак, Украина мландыште каен шогышо шучко, неле сар илалше да самырык-влакын чоныштымат коржеш. Тугеже ме чыланат тудын мучашлалтмыж верч тыршена. Сеҥымашлан ӱшанена. Тек калыкнат таза лиеш, да тудын сай шонымашыже шукталтеш!
Елена Григорьева, Шӱргыял школын вожатыйже.
Снимкыште: Кинер кундем калык деч погымо сарыш колташ ямдылыме полыш.