Людмила Евгеньевна ОРЕХОВА, Йошкар-Ола:
– Мыйын авам Ира Арсентьевна Фёдорова Морко район Ӱшӱттӱр ялеш шочын-кушкын. Тений 22 ию-
ньышто тудо 70 ийым тема. Авай ден ачай куд икшывым ончен куштеныт. Авана сулен налме канышыш кайымешкыже эре почтышто пашам ыштен, йӱр ма лум, але поранан игече – калыклан у газетым але журналым да пенсий оксам эре жапыштыже намиен шуктен.
Ял калык тудым эре порын вашлийын. А кунам ялыште иктаж-кӧ ешым погаш шонен гын, ик сӱанат авам деч посна эртен огыл, шӱшпык гай йӱкшӧ тораш солнен. Кидпашам ышташ шинчеш гын, ош тӱрыштӧ пеледышыже, лышташыже пуйто вигак ылыжыт, тамле пуш дене ӱпшалтыт.
Пайрем годым уна-влак погынен толыт гын, авамын ямдылыме кочкышыжым тамлен шерышт ок тем. Таклан огыл ковам ойла ыле: «Мемнан шешкын киндеркыжым кузе пурлат, туге мӱй гай умшаштет шула».
Теве тыгайрак мемнан йӧратыме авана.