Марий калыкын кинде дене кылдалтше шуко калыкмутшо уло. Ожно калык шурным ончен куштымо гыч тӱҥалын киндым кӱэшт лукмо марте чыла шке кид ыштен, санденак утларак аклен. Кызыт шукынжо киндым коҥгашке огына пыште, кузе ышталтмымат мондена. Но чылан огыл. Южыжо тачат, овартышым (закваскым) ыштен, киндым кӱэштеш. Нунын кокла гыч иктыже – Анастасия ОХОТНИКОВА.
Настя Йошкар-Олаште шочын-кушкын. Озаҥ оласе медицине университетыште педиатрлан тунем лектын. Но налме профессий дене пашам ышташ кумылжо лийын огыл. Тунам вургемым ужалыме кевытышт лийын, а вара декрет канышыш каен.
Самырык ава вич ий ончыч ешыж дене Оршанке район Ӱлыл Лопсола ялыш илаш куснен.
– Ялыш илаш куснаш пелашемын кумылжо лийын. Йоча-влак яндар южышто кушшаш да шке куштымо саскам кочшаш улыт манын шонен.
Кугурак эргынан кандаш тылзаш улмыж годым пелашем ялыште 70 сотык мландым да тошто пӧртым налын. Кеҥежым пӧртым ачалыме, вӱдым пуртымо, канализацийым ыштыме. Кокымшо эргына шочмо деч вара ялыш илаш кусненна, – ойла озавате.
Эн ончыч чывым гына онченыт, но кажне ийын вӱташте вольык шукемын. Кызыт чыве, комбо, каза улыт. Ончыкыжо сӧснам да шорыкым налаш шонат. Тыгак пакчаште чыла емыж-саскам куштат.
Анастасия олаште илымыж годымак чын кочмо правилым эскераш тӱҥалын. Тунамак киндым духовкышто кӱэштын. Ынде куд ий киндым пышта, мастер-класс-влакым ончен, тӱрлӧ йӧным кучылтеш да моло кумылан еҥ-влакым туныкта.
– Киндым кӱэшташ нимо нелыжат уке. Айдемын тунемаш да ышташ кумылжо уло гын, чыла ышташ лиеш. Мый коҥгаште тыгак итальян чабаттым, пиццым, француз багетым, круассаным ямдылем.
Икымше мастер-классым ныл ий ончыч палыме ӱдырын пачерыштыже эртаренам. Кумылан-влак шукын лийыныт. Тунам пачерыш огына шыҥе манын умыленам, сандене ик студий дене пашам ышташ тӱҥалынна. Кызыт гын тунемаш толшо-влак дене кулинарный студийыште вашлийына.
Руашым ямдылыме годым сай да волгыдо кумыл лийшаш. Руаш озаватын кумылжым шижеш
Мастер-классыш тӱрлӧ олала гыч еҥ-влак толыт. Мутлан, Киров, Санкт-Петербург, Чебоксар, Козьмодемьянск, Севастополь да Озаҥ гыч. Ӱшанем, умбакыжат вес олала гыч толаш тӱҥалыт,– ойлыш А.Охотникова.
– Те овартышымат шке ыштеда?
– Овартышым ямдылаш 5-9 кече кӱлеш. Эн ончыч вӱд ден ложашым лугем, а вара тидымак изин-изин кажне гана ешарем. Кӱэштме марте 12-18 шагат кая. Эрдене овартышыш ложаш ден вӱдым ешарен пыштем, кечывал деч вара руашым лугем. Йӱдым кӱэштам. Киндым да молымат коҥгаште да электродуховкышто кӱктем. Эрдене пелашем дене шокшо киндым кевытыш ужалаш наҥгаена.
Анастасия йодмо почеш арняште кок гана киндым да моло кочкышым кӱэштеш. Тудым Йошкар-Олаште «Артишок» кевытыш ужалаш кондат.
Самырык ава киндым да моло кочкышым кӱэштеш, емыж-саскам поген, телылан ямдыла, вольыкым онча, мастер-классым эртара. Тыгодым соцсетьымат вӱден шукта. Тушто киндым ямдылыме, вольыкым ончымо, емыж-саскам куштымо нерген каласкала.
А.Охотникова ден пелашыже ныл эргым ончен куштат. Кугуракше тений икымше классыш тунемаш каен. Икшыве-влак йочасадыш огыт кошт. «Мемнан йочасадна – мӧҥгыштӧ», – шыргыжалын ойла ава.
Кинде пукша, йӱкта, илаш туныкта… Тыге ойленыт калыкыште. Тиде калыкмут тачысе геройланнат келшен толеш. Тудо йоча-влак дене шинчыме пагытыште ешартыш оксам ышта, шке ешыжым шокшо, пушкыдо кинде дене куандара.