Кум шочшан ава, йӧратыме пелаш, пашалан кумылзак суртоза Ольга Аксаева яра жапшым кидпашалан пӧлекла. Тудо марий шӱлышан тӱрлӧ сӧрастарыше ӱзгарым, марий тӱран вургемым ямдыла.
Ольга Вячеславовна Пошкырт кундем Мишкан район Раевка селаште шочын. Кызыт ешыж дене Дӧртыльӧ район Йывачъялыште ила. Тысе школышто тӱҥалтыш класслам туныкта. Владимир пелашыж дене кум эргым куштат: Артём шымше классым тунем пытарен, Игорь кудымшо классыш вончен, Тимур вашке ик ийым тема.
– Школышто тунеммем годымак кидпашалан шӱмаҥынам. Кугурак класслаште тунеммем годым «Тӱрлымаш» кружокыш коштынам. Туштак гладь дене тӱрлаш тунем шуым. Шовычым, салфетке-влакым тӱрленна. Школ деч вара тиде паша ӧрдыжеш кодын, мондалтын, – каласкала О.Аксаева. – Кумшо икшыве дене декрет отпускышто улмем годым интернетысе соцкылыште Йошкар-Олаште илыше кидмастар Надежда Акиеван изи эргыжын фотожо шинчамлан перныш. Ош футболкышто «Изи патыр» манын тӱрлымӧ. Марий тӱрым тӱрлаш кумылем ончычак лийын, но тӱҥалаш ала жап, ала йӧн лектын огыл. Мый тунамак Надеждалан серен колтенам, марий тӱрым тӱрлаш тунемаш кумылем уло манын палдаренам. Тудо тӱрлаш туныктымо видеоурок-влакым ямдылаш тӱҥалынам манын возен. Кок тылзе гыч онлайн мастер-классыш ушнышым.
Видеоурок-влак полшымо дене Ольга Аксаева марий тӱрым тӱрлымӧ технике дене палыме лийын. Мастар кидпашазе тиде сомыллан вашке тунемын. Икмыняр жап гыч шкежат марий орнаментан тӱрлӧ сӧрастарыме ӱзгарым ямдылаш тӱҥалын: тыртыш да ныл лукан кулон-влакым, браслетым, пылыш кӧржым, оръеҥлан вуйышкыжо пижыкташ повязкым, автомашиналан подвескым. Куэмыш марий тӱрым тӱрлаш эн неле лийын. Но кид вашке тунемеш. Ынде изи Тимурынат «Изи патыр» манын возыман футболкыжо уло, тудым Ольга кок йӱдыштӧ тӱрлен шуктен. Эше пайремлашке чияш шкаланже марий тувырым тӱрлаш тӱҥалын.
– Кечывалым кидпашам ышташ жап уке, Тимур эше изирак, сурт сомылка ситышын: пакчаште тыршыман, вольыклан шудым ыштыман, емыжым погена. Кызыт – телылан шапашым ямдылыме жап: пеш шуко компотым ыштенам, киярым банкылаш шинчалтен оптенам. Пеледышым йӧратем, пакчаштем шуко тӱрлым шынденам, нунат шинчам куандарат, кумылым нӧлтат. Икшывем-влак дене жапым шукырак эртараш тыршем. Кастене чыла пашам пытарем, йоча-влак малаш возыт, да йӧратыме пашамлан пижам веле. Южгунам эрдене вольыкым кӱтӱш колтем да тӱрлаш шинчам. Кидпашам ыштыме годым жапын эртымыжым ом шиж, – манеш О.Аксаева.
Тудо, кидпашаже-влакым фотош войзен, соцсетьысе шке лаштыкышкыже луктеш. Еҥ-влак ужыт да тыгайымак ыштен пуаш йодыт. Пошкырт кундемын тӱрлӧ районжо гыч заказ-влак пурат, Моско гычат сӧрастарыме ӱзгар-влакым ыштен пуаш йодыт.
– Ятыр еҥ кидпашам кӱлеш семын ок акле. «Мыланем тиде огеш кӱл» але «Акше пеш шерге» манын ойлышыжат шагалын огыл. Ме шкеже марий улмынам огына ончыкто, тидын дене огына кугешне гын, моло-влак мемнам кунам вара пагалаш тӱҥалыт? Садлан тиде сомылым ончыкыжымат шуяш, вияҥдаш, тидлан кушкын толшо тукымым кумылаҥдаш шонем, – ойла Ольга Вячеславовна.
Ольга Аксаева гай марий чонан ӱдырамаш дене кугешнаш веле кодеш. Тек ончыкыжымат тудын пашаже вораҥын толеш. А чонжылан келшыше кидпашаже тек чон ласкалыкым конда да лектышан лиеш.
В.Семёнован фотожо.