Ятыр ӱдырамаш, ава лиймеке, декрет отпускышто икшыве дене шинчыме годым тӱрлӧ кидпашалан кумылаҥеш. Икте сӱретлаш, весе пидаш, кумшо ургаш… Теве Йошкар-Олаште илыше Ольга Красноваланат Настя ӱдыржӧ — шкешотан «муза».
Тидын нерген кидмастар тыгерак каласкалыш:
– Ӱдырем тунам икмыняр тылзаш веле ыле. Пӱйжӧ чыгылташ тӱҥалме годым, кидышкыже мо логалын, тудым умжашкыже чыкен. Ава семын тургыжланенам, садлан мотор, ойыртемалтше, лӱман чыгылтышым (пурышым) шке ыштенам. Тидлан интернетыште икмыняр видеоурокым онченам, кӱлеш материалым заказатленам. Мыланем моткоч келшен, ӱдыремат куандарен. Тылеч вара еҥын йодмышт почеш ыштылаш тӱҥалынам. Чыгылтыш дене пырля лӱман булавкым келыштаренам. Йодшо-влак ятыр лийыныт, вес кундемлашкат почто гоч колтеденам.
Кидмастар лиям манын, ик гана шонен омыл. Икшывем кушмо семын, интернет сайтлаште тыгай еҥ-шамычын пашаштым утларак эскераш тӱҥалынам. Тыге пеледышан светильникым ыштен ончаш кумылем лектын. Икымше пашамын лектышыже тачат шинчаончылнем. Чыным ойлаш гын, пешыжак сайын лектын огыл, но мый моткоч тыршенам.
Тунемде ончыко от кай маныт. Тыге ойлымо Ольгалан лач келшен толеш. Мастарлыкшым шуараш, сайынрак ышташ манын, кидмастар ятыр видеуроклан эҥертен, курс-влакым тӱлен налын, шинчымашыжым пойдарен. Тӱҥ шотышто шукыжо шке семын тунемын. Ончыч йолташыже, родо-тукымжылан пӧлек шотеш ямдылен. Икмыняр фотом «Вконтакте» лаштыкыш вераҥдымеке, подписчикше-влак заказ почеш ышташ йодыныт. Тидыже ӱдырым эшеат кумылаҥден. Варажым тудо тӱрлӧ пеледышым да пӧртым сылнештарыше моло арверымат ыштылаш тӱҥалын.
– Кажне пашаш чоным пышташ тыршем. Тыге нуно сайрак да сӧралрак лектыт. А кунам еҥ-влак поро шомакыштым, таумутыштым ойлат кумыл эшеат нӧлтеш. Ӱдырем изирак лиймыж годым йӱдым шуко шинчылташ логалын, кызыт гын тунемыннам, кидемат лывырген шуын. Шукыж годым кастене, яра жап лекме годым але каныш кечылаште шинчылтам. Материал-влакым интернет-кевытлаште наледем. Тидланат шагал огыл жап кӱлеш.
Еҥын йодмышт почеш ыштыме годым, мутат уке, эн ончыч нунын кумылыштым шотыш налам. Нуно мыланем тӱс, дизайн шотышто шке шонымашыштым ойлат, – мане тудо.
Ольга пеледыш-шамычым ыштылаш фоамираным, фетрым, изолоным кучылтеш. Коллекцийыштыже пион, роза, лилий, орхидей, гортензий да моло пеледыш-влакат улыт. Нуным мотор вазе але пеледышкоркаш сӧрастара. Тудо тыгак пеледыш-шамычым светильник семын келыштара. Тыгайже кастене але йӱдым пӧлемлан поснак ямым пуртат. Шукерте огыл ӱдыр мыльный композиций-влакым ыштылаш тӱҥалын. Мо гынат, тудо ик верыште огеш шинче – эреак ум кычалеш. Тидын дене клиентше-влакым куандара. Кидмастарын пашаже-влак, чынжымак, чоным йӱлалтат.
О.Краснован альбомжо гыч налме фото-влак.