Медведево район Пӱкшерме тӱвыра пӧртыштӧ «Весела кумыл» ансамбльын балетмейстерже да «Орешки» образцовый йоча ансамбльым вуйлатыше Екатерина Рыбакова – кум шочшан ава. Тудо Марий Эл Республикысе Калык-влакын тӱвыра пӧртышкышт «Ӱярня йор-йор. Ӱярнясе еш йӱла» унагудыш Лена ӱдыржӧ дене пырля толын ыле.
Рыбаковмыт еш 13 ий ондак шочын. Самырык мужыр эн ончыч Йошкар-Олаште илен. Но чонышт ялышкак шупшын. Сандене 18 ий ондакак тушко пӧртылыныт. Кызыт эркын дене у пӧртым чоҥат. Ава тӱвыра пӧртыштӧ тырша. Ача Игорь Валентинович сварщиклан пашам ышта.
Кугурак эргышт Йошкар-Оласе 29-ше номеран школышто тунемеш, а эн изи Андрюша йочасадыш коштеш. Пеленышт Екатеринан ачаже Вячеслав Арсентьевич Степанов ила. Чыланат «Уло еш дене» акцийыш ушненыт. Тыште кочат кугу полышым пуэн. Вет Екатерина Вячеславовнан кочаже столяр лийын, ачажымат шуко сомыллан туныктен, ятыр арверже кодын. Акций годым Вячеслав Арсентьевич кугурак уныкажлан ты паша нерген шуко каласкален, мо кузежым ончыктылын. Кириллат кидпашам ышташ да сӱретлаш путырак йӧрата, сандене кочаж деч тӱрлыжымат йодыштеш.
Ава – тале кидмастар. Тудо ансамбльжылан оҥеш сакыме ший аршашым да моло сӧрастарыме настамат шкеак ыштен пуэден.
– Медведево районысо вургемым саклен шогена. Ты шотышто ятыр шымленам. Мемнан велне ший аршашым шемалге-йошкар (бардовый эше маныт) куэмеш ышташ кӱлеш манын кычал муынам, кызыт лач тыге сӧрастарена.
Еш дене акцийыш ушнымына вашла умылаш да полшен шогаш полша. Йоча-влаклан мемнан жапысе «Резиночке» модышым туныктенна, тыгодым моткоч оҥайын тӧрштылын, жапым эртаренна. Кочашт пашкар дене модаш ончыктен. А нуно шукыжым огыт пале, тӧрштылынат огыт мошто, мыланна оҥай, а нуно ӧрыт, – каласкала Екатерина Вячеславовна.
10 ияш Ленук «Орешки» ансамбльыш коштеш. Тӱрлӧ мероприятийыште шке мастарлыкшым ончыкта. Тудлан Чебоксарыште эртарыме фольклориадыште келшен. Пытартыш жапыште Москошто гына ныл(!) гана лийын. Кодшо ий мучаште «Весела кумыл» ансамбль дене пырля Кремльыште выступатлен! Тыгак проектым возымо пашалан кӧра ВДНХ-шке логалын.