Елена Бушуева дене Йошкар-Олаште эртаралтше «Абилимпикс» чемпионат годым палыме лийынам. Тунам тудо «Бисероплетение» компетенций дене икымше верыш лектын. Самырык еҥ бисержым ондак кидышкыже кученат огыл, лач кугурак шер дене тӱрлӧ настам ыштылын ончен улмаш. Вигак – икымше вер! Тыгай еҥын кидше лывырге, парняже модеш веле маныт.
Кодшо кечылаште Е.Бушуева деке рӱдолаште илыме пачерышкыже унала мийышым. Еленан пӧлемже – шкешотан изи мастерской. Мом гына самырык еҥ огеш ыштыл?!
Эн ончычак шинчамлан тудын суртводыжшо-влак койыч: иктыже весыж деч сӧрал, кажныже шкешотан, ойыртемалтше. Кумылым савырыше моло арвержымат ончен куанет. Кеҥежым Киров уремысе изи пазарышке ужалаш лектын коштмо кугу сумкаж гыч ятыр кидпашажым луктын ончыктыльо…
Илаш кусненыт
Бушуевамыт 2021 ий кеҥежым Марий кундемыш илаш кусненыт. Кумытын: тудо, аваже да ӱдыржӧ. Еленан аваже, Роза Леонидовна, Шернур район Шӱкшер ялыште шочын, родыжо-влакат Марий Элыште улыт. Ятыр ий Свердловск область Лесной олаште ешыж дене илен. Марий ӱдырамаш бухгалтерлан 30 ий пашам ыштен. Пелашыже еш гыч шукертак каен.
Елена 9-ше класс марте школышко тунемаш коштын. 10-11-ше классласе занятий-влакым туныктышо-шамыч мӧҥгыштыжӧ эртареныт. Ургызылан тунем лектын. Кум вере икмыняр жап дене пашамат ыштен ончен. А 2012 ийыште ӱдыржӧ шочын. Кызыт Аня – аважын полышкалышыже.
Азалан куанымыж да тудым ыштымыж нерген Елена шинчавӱд деч посна каласкаленжат ок керт. Ӱдырын ачаже – школ годсек келшыме йолташыже. Но шочмыж годсек ДЦП черан Елена ешым чумыраш тоштын огыл, тыгай ошкылым ышташ лӱдын. Пиалешыже, йоча таза шочын.
Еленан эн кугу эҥертышыже – аваже. Тудо ӱдыржым кӱлеш верыш машина дене кондыштара. Нуно кажне кугарнян репетицийышке вашкат. Лена – «Дебют» ансамбльын участницыже. Кызыт тудо кок инвалид ӱдыр дене пырля куштымашым тунемеш.
УМБАКЫЖЕ — 18 февральыште лекше «Кугарня» газетыште.
