Мыйым кочам ден ковам ончен куштеныт. Ача-авам изиэм годымак ойырленыт. Авам уэш марлан лектын, шольымым вес ешыш пеленже налын, а мыйым коча-ковамлан коден каен.
Изиэм годым ковамын кид шагатше ыле. Туддене модаш, пижыктег ончаш келшен. Шке пижыктен ом керт да ковам деч полышым эре йодынам. Кугурак лиймекем, кочам мыланемат тыгай шагатым налын пуэн. Тудым кызытат аралем, но пижыктымаш уке.
Кочам ден ковам ты тӱня дене шукертак чеверласеныт. Мыят ешан улам. Икана кум ияш ӱдырем коробка гыч ковамын да мыйын кок кид шагатым муын луктын. Тек модеш, шоналтышым. Но ик кечын тудо мый декем кухньыш куржын тольо да ковамын шагатшым пижыктен пуаш йодо. Полшышым, тыгодым ӱдырем шинчашкем тура ончале да мане: «Шарнет, изиэт годым мыят тыланет тыге пижыктен пуэм ыле?» Ӧрмем дене тӱҥын шогальым. Мом ойлыштат манын йодмемлан икшыве нимом ыш вашеште да пӧлемышкыже куржын колтыш. Кутырымынам пелашемат колын. Тылеч вара кужун шонкален шинчышым. Ӱдырна коватын колымекыже шочыныс, мане тунам пелашем. Вара мыят радамлаш пижым.
Кочам колымеке, эрге икшывына шочын, ковам колымо деч вара ӱдырым ыштенам. 10 ияш эргына – чылт кочам: тудын гаяк ошалге, кандалге-сур шинчан, кужу капан. Кочамын кидше чыла пашалан толеш ыле. Эргымат тӱрлым ыштылаш йӧрата. Ӱдырна мыйын гай шемалге ӱпан, шем шинчан. Изиэм годым пошкудына-влак чылт коват гай коят маныт ыле мыланем. Реинкарнаций манме (ик чон весыныш куснымаш) нерген ынде чӱчкыдын шонкалем.
Ольга.
Волжский район.
https://ru.freepik.com/ сайт гыч налме фото.